نەمەرەسىنىڭ تويىنا ءۇي سىيلاماقشى بولعان زەينەتكەر بانك توناعان

 استانا. قازاقپارات - لەنينگراد وبلىسىندا تۇراتىن زەينەتكەر ەسەپشوتىنداعى اقشاسىن ەكى ەسە كوبەيتىپ، نەمەرە قىزىنىڭ ۇيلەنۋ تويىنا سىيلىق رەتىندە پاتەر الىپ بەرۋ ءۇشىن بانك توناۋ وپەراتسياسىن ۇيىمداستىرعان.

بۇل تۋرالى «كومسومولسكايا پراۆدا» حابارلادى، دەپ جازادى Stan.kz اقپاراتتىق اگەنتتىگى.

نەمەرەسىنىڭ تۇرمىسقا شىعاتىنىن ەستىگەن زەينەتكەر، وعان سىيلىق رەتىندە پەتەربۋرگتەن پاتەر الىپ بەرەمىن دەپ ۋادە ەتكەن. اجەيدىڭ بانكتە وسى ۋاقىتقا دەيىن جيناعان اقشاسى بولعان. ءبىراق، ونىڭ ەسەپشوتىنداعى 530 مىڭ رۋبل، شامامەن 2861290 تەڭگە ءۇي ساتىپ الۋعا جەتكىلىكسىز بولدى.

سودان ول بانك توناۋ تۋرالى شەشىم قابىلدادى. زەينەتكەر ول ءۇشىن قۇربىسىنىڭ 21 جاستاعى جۇمىسسىز نەمەرەسى مەن زەينەتكەرلىككە شىققانعا دەيىن بىرگە جۇمىس ىستەگەن بانك فيليالىنىڭ كاسسيرىن تارتقان. ەگدە جاستاعى ايەل جاس جىگىتكە قاراقشىنىڭ ءرولىن سومداعانى ءۇشىن 20 مىڭ رۋبل بەرۋگە ۋادە ەتىپ، ال بۇرىنعى ارىپتەسىنە بانك توناۋ قويىلىمىنا قاتىسقانى ءۇشىن اقشالاي وتەماقى بەرەمىن دەگەن. سودان كەيىن، ول بانكتەن ۇرلانعان جارتى ميلليوندى وتەۋلەرىن تالاپ ەتپەكشى بولىپ، جوسپار قۇرعان.

«كاسسيردىڭ سوزىنشە، تاڭەرتەڭ بانك بولىمشەسىنە قارا كوزىلدىرىك كيگەن، بەتىن كاپيۋشونمەن جاۋىپ العان قاراقشى باسىپ كىرگەن. ەر ادام: «پوليتسياعا قوڭىراۋ شالامىن دەپ ويلاما، اقشانى ۇستەلگە قوي!» - دەپ داۋىستاپ، قىزمەتكەردى شكافقا قاراي يتەرىپ جىبەرگەن. قاتتى سوققىدان جابىرلەنۋشىنىڭ باسىنا سورەدەگى گۇل سالىنعان قۇمىرا قۇلاپ كەتىپ، كاسسير ەسىنەن تانىپ قالعان. سول ۋاقىتتا توناۋشى ۇرلانعان 530 مىڭ رۋبلدى، شامامەن 2861290 تەڭگەنى الىپ، قاشىپ كەتكەن»، - دەيدى قىلمىس ورنىنا كەلگەن پوليتسيا قىزمەتكەرى.

بانك توناي سالىسىمەن كوشەگە شىعىپ كاپيۋشونىن شەشكەن ۇرى جولدان تانىستارىن كەزدەستىرىپ قالعان. ال، ولار توناۋ تۋرالى بىلگەن سوڭ، پوليتسياعا بانكتەن شىققان دوستارىن كورگەندەرىن ايتقان. قازىر بانك توناۋ قويىلىمىنا قاتىسقانداردىڭ بارلىعى ۇستالىپ، مەكەن-جايىن تاستاپ كەتپەۋ تۋرالى جازباشا مىندەتتەمە الدى. ولاردىڭ ۇستىنەن «توناۋ» بويىنشا قىلمىستىق ءىس قوزعالدى. ەندى بانك توناۋدى ۇيىمداستىرعان الاياقتار جەتى جىلعا كولونياعا جابىلۋى مۇمكىن.