كاتونقاراعايدا دەمالۋ ءۇشىن قانشا قاراجات كەرەك

استانا. قازاقپارات - كاتونقاراعاي سول كورىكتى مەكەندەردىڭ كوش باسىندا. ەندەشە سول جەرگە ءبىر كەلۋگە قۇمارتقان اعايىن قالاي جەتەدى؟

بۇل تۋرالى قازاقپارات altaynews - قا سىلتەمە جاساپ حابارلايدى.

جەتۋدىڭ جولى كوپ. مىسالى، ساياحاتشى استانالىق نەمەسە الماتىلىق بولسىن دەيىك. ول اۋەلى وسكەمەن قالاسىنا كەلۋگە ءتيىس. بيلەت ساۋداسىمەن اينالىساتىن تانىمال سايتتاردىڭ جازۋىنشا، ۇشاق قۇنى 20 مىڭ مەن 80 مىڭنىڭ اراسىندا قۇبىلىپ تۇرادى. اۆتوبۋس بيلەتىنىڭ قۇنى 6-8 مىڭ، پويىز بيلەتىنىكى 4-7 مىڭ تەڭگە شاماسىندا. كەيىنگى ەكى كولىكپەن شىقساڭىز، جولعا ءبىر تاۋلىك ۋاقىت ارناۋعا تۋرا كەلەدى. ال جەكە كولىكپەن شىعامىن دەگەن اعايىن بولسا، ماسەلە باسقا... ۇشاقپەن ءبىر جارىم ساعاتتا كەلىپ جەتۋگە بولادى.

وسكەمەننەن ارى قاراي قالاي بارادى؟

«وندا پويىزبەن، ۇشاقپەن بارۋدىڭ مۇمكىندىگى جوق. اۆتوبۋس، ايتپەسە تاكسي»، - دەيدى كاتونقاراعاي اۋدانى كاسىپكەرلىك، ونەركاسىپ جانە تۋريزم ءبولىمىنىڭ باس مامانى ەلدار مەديەۆ. - جول ەكەۋ. جيھانگەزىمىز تەك قانا تاۋدىڭ ءىشىن ارالاپ بارامىن دەسە، زىريان اۋدانىنداعى ءيىر- ءيىر سەرپانتينمەن وتەدى. ال تاۋمەن بىرگە سۋدى، جازىق دالانى دا كورەيىن دەسە، سامار اۋىلىن باسىپ، ودان ءارى بۇقتىرما وزەنىنەن پاروممەن ءجۇزىپ، كاتونقاراعاي اۋدانىنىڭ ورتالىعى ارقىلى بارادى. ءوز باسىم سوڭعى جولمەن جۇرۋگە كەڭەس بەرەر ەدىم. ول ءارى قىزىقتى، ءارى ءمىنسىز. ەكى جاقتىڭ دا ۇزاقتىعى بىردەي - شامامەن اۋدان ورتالىعى ۇلكەن نارىنعا دەيىن - 350، ودان ارى دەمالىس ورىندارىنا دەيىن 100-150-دەي شاقىرىم.

كاتونقاراعايعا جەتتىڭىز. ساياحاتشىنىڭ ەندىگى تابان تىرەر ورنى قايسى؟

ەلدار مەديەۆ ۇسىنعان كاتونقاراعايداعى شيپاجايلار مەن دەمالىس ورىندارىنىڭ ءبىر- ەكەۋىنە توقتالىپ وتەيىك.

«راحمان قاينارى» شيپاجايى. جارالى اڭنىڭ اياعى سۋعا ءبىر ماتىرعاننان ساۋىعىپ كەتەتىن شيپالى اراسان وسى. وندا 40-تان استام تۇرعىن ءۇي بار. قوناق ءۇي بولمەلەرىنىڭ باعاسى 7000 تەڭگەدەن باستالىپ، 11000، 15000 دەپ كەتە بەرەدى. ال كوتتەدجدەر 30 مىڭنان جوعارى. 150 مىڭعا دەيىن.

«مارالدى» پانتىمەن ەمدەۋ كەشەنى. كەلۋشىلەر مارال ءمۇيىزىنىڭ سورپاسىنا، ياعني بۇلاۋعا تۇسەدى. مۇندا 20 ادامعا شاقتالعان جاتىن ورنى بار. ءۇش ۋاقىت قۇنارلى تاماق بەرىلەدى. جولداما اقىسى 19-20 مىڭ تەڭگەنىڭ كولەمىندە.

«وسى ورايدا كاتونقاراعايدىڭ بال قىمىزى جايلى ايتپاي كەتۋگە بولماس. ءيا، مۇقىم ەل اۋزىنىڭ سۋى قۇرىپ ماقتايدى. قىمىز بۇل جاقتاعى كەز كەلگەن دەمالىس ورنىنان تابىلادى. ليترى 350 تەڭگەدەن باستالادى. سونداي-اق، قازاقتىڭ ايءمۇيىز جازۋشىلارى اسەمدىگىن جابىلا جازعان سۇلۋ تابيعات اياسىندا جىلقىمەن سەرۋەندەۋگە دە بولادى. بۇلتتىڭ ءوزى تابانىڭىزدىڭ استىندا ءجۇزىپ جۇرەدى»، - دەيدى ەلدار مەديەۆ.