سەمەيدە سۋ تاسقىنىنان زارداپ شەككەندەرگە پاتەر بەرىلدى
بۇگىن باسپانالارى تۇرۋعا جارامسىز بولىپ قالعان پريستان اۋدانىنىڭ ەكى وتباسىنا پاتەرلەردىڭ كىلتى تابىستالدى. سەيت جانە ساندۋعاش جۇمادىلوۆتەر مەن مارات زايكەنوۆتەر وتباسىنا قالاداعى جاس الاش، 6ا مەكەنجايىندا جاڭادان بوي كوتەرگەن كوپ قاباتتى تۇرعىن ۇيدەن 2 جانە 3 بولمەلى پاتەر بەرىلدى.
قالا اكىمى ەرماك ءسالىموۆ تۇرعىندارعا پاتەر كىلتىن تابىستاپ، جاڭا قونىستارىمەن قۇتتىقتادى.
«بۇگىنگى كۇنى سۋ باسقان اۋدانداردا باسپانالاردى قالىپقا كەلتىرۋ جۇمىستارى قارقىندى ءجۇرىپ جاتىر. پريستان جانە زاتون اۋداندارىندا 205 ءۇي زارداپ شەكتى. ونىڭ ىشىندە 9 ى اپاتتى دەپ تانىلدى. بۇگىنگى كۇنى 8 تۇرعىن جاڭا ۇيگە قونىس اۋدارىپ ۇلگەردى. ول باسپانانى وزدەرى تاڭدادى. ۇيلەر رەسپۋبليكالىق بيۋدجەت ەسەبىنەن ساتىپ الىندى. ال بوبروۆكا ساياجايىنداعى ۇيلەردى اكىمشىلىك بيۋدجەتتەن تىس قاراجاتقا جوندەپ بەرىپ جاتىر»، - دەدى ەرماك ءسالىموۆ.
ايتا كەتەيىك، جالپى كوكتەمگى سۋ تاسقىنىنان 204 باسپانا ءبۇلىندى. ونىڭ 110 ى بوبروۆكا ساياجايىندا. زارداپ شەككەن ۇيلەردى جوندەۋگە رەسپۋبليكالىق قازىنادان 371 ميلليون تەڭگە، ال جاڭا باسپانالار ساتىپ الۋ ءۇشىن 58 ميلليون تەڭگە ءبولىندى.
