مەملەكەتتىك قىزمەتشىلەر كۇنى: قازاقستاندا كادرلاردىڭ اۋىسۋى ەكى ەسەگە قىسقاردى

استانا. قازاقپارات - ق ر مەملەكەتتىك حاتشىسى گۇلشارا ءابدىقالىقوۆا قازاقستاننىڭ مەملەكەتتىك قىزمەتشىلەرىن كاسىبي مەرەكەسىمەن قۇتتىقتادى، دەپ حابارلايدى قازاقپارات ءتىلشىسى.

ءوز قۇتتىقتاۋىندا مەملەكەتتىك حاتشى ەلىمىزدە 98 مىڭعا جۋىق مەملەكەتتىك قىزمەتشىنىڭ تابىستى ەڭبەك ەتىپ جۇرگەنىن اتاپ ءوتتى.

«ەكونوميكالىق ىنتىماقتاستىق جانە دامۋ ۇيىمى ساراپشىلارىنىڭ پىكىرىنشە، قازاقستانداعى مەملەكەتتىك قىزمەت جۇيەسى جاھاندىق ستاندارتتارعا سايكەس كەلەدى، ال مەملەكەتتىك اپپاراتتىڭ قارتايۋى مەن گەندەرلىك تەڭگەرىمسىزدىك كورسەتكىشتەرى بويىنشا، ولاردىڭ الدىن الۋ بايقالعان.(...) 2015 -جىلدان بەرى كادرلاردىڭ اۋىسۋى ەكى ەسەگە قىسقاردى (2015 -جىلى %11,2، 2017 -جىلى - %6,2). باقىلاۋشىلار مەن ساراپشىلار ينستيتۋتىنىڭ ارقاسىندا ىرىكتەۋ بارىسى اناعۇرلىم اشىق جانە ترانسپارەنتتى بولا ءتۇستى»، - دەدى مەملەكەتتىك حاتشى مەملەكەتتىك قىزمەتشىلەر كۇنىنە وراي ۇيىمداستىرىلعان گالا-كونسەرتتە.

ونىڭ ايتۋىنشا، قازاقستاندا مانساپتىق جولدا وسكەن مەملەكەتتىك قىزمەتشىلەر سانى 4 ەسەگە ارتقان جانە حالىقتىڭ كونكۋرستىق پروتسەدۋرا مەن جالپى مەملەكەتتىك قىزمەتكە دەگەن سەنىمى ۇلعايعان.

«مەملەكەت باسشىسى بيىلعى جولداۋىندا ءوز تاريحىن، ءتىلىن، مادەنيەتىن بىلەتىن، زامانىنا لايىق، شەت تىلدەرىن مەڭگەرگەن وزىق ءارى جاھاندىق كوزقاراسى بار قازاقستاندىق ءبىزدىڭ قوعامىمىزدىڭ يدەالىنا اينالۋى ءتيىس دەپ اتاپ ءوتتى. ءبىز - مەملەكەتتىك قىزمەتشىلەر كوشباسشىنىڭ سىندارلى ساياساتىن جۇزەگە اسىرۋشى رەتىندە اتالعان تالاپتارعا ساي بولۋ ءۇشىن بار كۇش- جىگەرىمىزدى، ءبىلىم مەن بىلىگىمىزدى جۇمساۋعا ءتيىسپىز»، - دەدى گۇلشارا ءابدىقالىقوۆا.

ايتا كەتەيىك، قازاقستاندا 23 -ماۋسىم - مەملەكەتتىك قىزمەتشىلەر كۇنى بولىپ جاريالانعان. بۇگىن استانادا «قازاقستان رەسپۋبليكاسىنىڭ ۇزدىك مەملەكەتتىك قىزمەتشىسى» رەسپۋبليكالىق كونكۋرسىنىڭ جەڭىمپازدارى ماراپاتتالدى. كونكۋرستىڭ ەڭ جاس جەڭىمپازى 24 جاستا بولسا، ەڭ ۇلكەنى - 53 جاستا.