تۇركىستان وبلىسىندا «تولە ءبي» اتتى كينو تۇسىرىلۋدە
ءوڭىر باسشىسى جانسەيىت تۇيمەبايەۆتىڭ باستاماسىمەن قولعا الىنعان «تولە ءبي» فيلمىنىڭ العاشقى تۇسىرىلىمدەرى تولە ءبي اۋدانىنداعى قورعانتاۋ بوكتەرىندە وتۋدە، دەپ حابارلايدى قازاقپارات ءتىلشىسى.
تاريحي تۋىندىنىڭ جەلىسى بەلگىلى جازۋشى، جۋرناليست شويبەك ورىنباي مەن مارحاببات بايعۇتتىڭ «تولە ءبي» اتتى جەتى تومدىق ەڭبەگىنە نەگىزدەلگەن. بيۋدجەتى 150 ميلليون تەڭگە بولاتىن فيلمدى جەرگىلىكتى «ساق» كينوستۋدياسى تۇسىرۋدە. جالپى، وتاندىق كينو ونىمىنە جەرگىلىكتى 500 دەن استام ءارتىس تارتىلعان.
باستى ءرولدى م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ 3 -كۋرس ستۋدەنتى ابزال اتتى بوزبالا سومدايدى. كوپ سەريالىق فيلمنىڭ ءتۇسىرىلىم بارىسىن ايماق باسشىسى تولە ءبي اۋدانىنا جاساعان ساپارى كەزىندە كورىپ قايتتى.
«فيلمنىڭ العاشقى سەريالارىن قورعانتاۋ جوتاسىنىڭ ەتەگىندە ءتۇسىرۋ دە تەكتەن- تەك ەمەس»، - دەيدى كينو مايتالماندارى.
ويتكەنى ءۇش ءجۇزدىڭ تورەسى بولعان - تولە بابا ناق وسى تاۋدىڭ ەتەگىندە ءومىرىنىڭ ءبىراز بولىگىن وتكىزگەن دەسەدى. ول تۋرالى اڭىز- اڭگىمەلەردىڭ تامىرى دا تەرەڭدە جاتىر. ءوز زامانىندا قازاق حاندىعىنىڭ تۇتاستىعى ءۇشىن كۇرەسكەن ول جاستايىنان ادىلدىگى مەن شەشەندىگى ارقىلى كوپكە تانىلعانى بەلگىلى.
قازاقتىڭ بىرلىكتە، كەلىسىمدە جانە ىنتىماقتاستىقتا ءومىر ءسۇرۋىن ويلاپ، قام جەگەن قوعام قايراتكەرىنىڭ بولمىسى بۇل فيلمدە جان- جاقتى بەينەلەنبەك. كوركەم تۋىندىنىڭ سوڭعى سەريالارى ءۇش ءجۇزدىڭ باسى قوسىلعان قاسيەتتى ورداباسى تاۋىندا تۇسىرىلمەك. كوپسەريالى تاريحي فيلم جىل سوڭىنا تامان كورەرمەنگە جول تارتادى دەپ كۇتىلۋدە.
ايتا كەتەيىك، بۇعان دەيىن ءوڭىر باسشىسى جانسەيىت تۇيمەبايەۆتىڭ باستاماسىمەن «كۇش اتاسى - قاجىمۇقان» ، «كيەلى قازىعۇرت» ، «وتىراردى قورعاۋ» سىندى مۋلتفيلمدەر مەن 10 سەريالى «كونە جەتىگەننىڭ سىرى» اتتى فيلمى ءتۇسىرىلىپ، كورەرمەندەر نازارىنا ۇسىنىلعان.