مەسسيگە تۇسەتىن سالماق سونشالىق اۋىر ما؟
ارگەنتينالىق ليونەل مەسسي چەمپيوناتقا 44 ميلليون ادامنىڭ ءۇمىتىن ارقالاپ كەلدى. ونىڭ قانشالىق جۇك ەكەنىن الەم كۋبوگىنىڭ اسا ماڭىزدى ماتچى باستالار الدىندا كوزىن جۇمىپ، قولىمەن ماڭدايىن ۋقالاپ تۇرعان مەسسيدىڭ سۋرەتىنەن بايقاۋعا بولادى.
«بارسەلونا» شابۋىلشىسى ءوزىنىڭ باسەكەلەسى كريشي تانۋ رونالدۋدىڭ پورتۋگاليا ساپىنداعى ەكى ويىندا ءتورت گول سوققانىن، ونىڭ ىشىندە يسپانيامەن ويىندا حەت- تريك جاساعانىن كوردى.
حورۆاتيادان 3-0 ەسەبىمەن جەڭىلگەن سوڭ ارگەنتينانىڭ D توبىنداعى تاعدىرى ەندى ونىڭ ءوز قولىندا ەمەس؛ كەلەسى كەزەڭگە ءوتۋ ماسەلەسى وزگە كوماندالاردىڭ ويىن ناتيجەسىنە بايلانىستى.
ءبىراق نەگە مەسسي سونشالىق ناشار وينادى؟ ول وزىنە تىم كوپ جاۋاپكەرشىلىك الىپ جاتقان جوق پا؟ بۇل جەڭىلىسكە ول كىنالى مە؟
«مۇنداي ويىندى قاشان كورگەنىم ەسىمدە جوق»
وسىنىڭ الدىنداعى كۇندەرى مەسسي يسلانديامەن سەنبى كۇنگى ويىندا تەڭ ءتۇسىپ قالعانىن اۋىر قابىلداپ، ءتىپتى ارگەنتينا قۇراماسى قىزمەتكەرلەرى ۇيىمداستىرعان باربەكيۋگە بارماي، جالعىز ءوزى وتەلدە جاتىپ العانى تۋرالى ايتىلدى.
مەسسيدىڭ سوڭعى ويىن الدىندا ماڭدايىن ۇستاپ تۇرۋ سەبەبى باسى اۋىرعاننان با؟ وندا نيجنيي نوۆگورودتاعى وسى ماتچتا «چەلسي» قاقپاشىسى ۋيللي كابالەرونىڭ قاتەلىگىنەن انتە رەبيچ گول سوعىپ، مۇنىڭ ارتى ارگەنتينانىڭ 1958 -جىلدان بەرگى الەم كۋبوگىنىڭ توپتىق تۋرنيرىندەگى ەڭ اۋىر جەڭىلىسىنە ۇلاسقان سوڭ ونىڭ باسى ودان قاتتى اۋىراتىن شىعار.
«بارسەلوناداعى» بۇرىنعى كوماندالاسى سەسك فابرەگاس ويىندى BBC One ارناسىندا ساراپتاۋ كەزىندە ارگەنتينا قۇراماسىن «بۇزىلىپ قالعان كوماندا» دەپ اتادى. ال كوماندانىڭ رۋحى تۋرالى سۇراعاندا ولار « ءبىر ءبىرى ءۇشىن ەمەس، ءبىر بىرىنە قارسى وينادى» دەپ جاۋاپ بەردى.
«بۇل مەسسيگە قيىن ءتيىپ جاتىر. ونىڭ كوماندالاستارى ساپالى ويىن كورسەتە الماۋدا. وعان ەۆەر بانەگا مەن دجوۆاني لو چەلسو جەتىسپەدى. مەسسيگە ويىندى قۇرۋعا كومەكتەسەتىن بىرەۋ كەرەك» دەدى فابرەگاس.
2014 -جىلعى الەم كۋبوگىندا ارگەنتينا قۇرامىندا ويناعان «مانچەستەر ءسيتيدىڭ» بۇرىنعى قورعاۋشىسى پابلو زابالەتا كوماندانىڭ جىلدامىراق ويناي الماۋى سالدارىنان ويىن سوڭىنا قاراي مەسسي وقشاۋ قالىپ قويعانىن ايتادى.
«مۇنداي ويىندى قاشان كورگەنىم ەسىمدە جوق. كوماندا تىم ناشار. نە جاساعالى تۇرعانى بادىرايىپ تۇرادى جانە كرەاتيۆتى ەشتەڭە جوق» دەدى زابالەتا.
انگليانىڭ بۇرىنعى كاپيتانى الان شيرەر بولسا «ارگەنتينادا جوسپار بولعان جوق، ويىنى جۇيەسىز، بەيبەرەكەت» دەدى.
«مەسسي سوڭعى ىسقىرىق شالىنا سالىپ الاڭنان كەتتى، العاشقىلاردىڭ ءبىرى بولىپ ىشكە بەتتەدى.
ارگەنتينانىڭ كوگىلدىر- اق ءتۇستى فورماسىندا بۇعان دەيىن دە تالاي قينالعان فۋتبولشى ءۇشىن بۇل وتە- موتە اۋىر كەش بولعانى انىق كورىنىپ تۇردى.
ويىننىڭ باسىم بولىگىندە مەسسي جوق بولىپ كەتتى. «بارسەلونادا» دا ول كەيدە سويتەدى، ءبىراق وندا باسقاشا - كوپ ۋاقىت وتپەي ول وقيعانىڭ قاق ورتاسىنان ءبىراق شىعادى. ءسىز مەسسيگە قاراپ وتىراسىز دا ءبىر مەزەتتە ونىڭ عاجايىپ تالانتى جارق ەتەتىن ءساتتى كۇتەسىز. ءبىراق كەشە ول ءسات كەلمەدى» دەيدى BBC Sport ساراپشىسى پاتريك دجەننيگس.
حورۆاتيامەن ويىندا مەسسي 49 رەت دوپقا ءتيدى، ءبىراق ونىڭ تەك ەكەۋى عانا قارسىلاستىڭ الاڭىندا بولدى.
ويىننىڭ تەك 64-مينۋتىندا مەسسي قاقپاعا سوققى جاسادى.
وتكەن ەكى ويىندا ول قاقپاعا بارلىعى ەكى سوققى جاسادى. بۇل وسى چەمپيوناتتا گول سوقپاعان ويىنشىلاردىڭ كورسەتكىشىمەن شامالاس.
الەم كۋبوگىنا قۇرامانى وسىلاي جاساقتاعانى ءۇشىن ارگەنتينا باس باپكەرى حورحە سامپاولي قىسىمعا ۇشىراپ جاتىر. ول يتاليانىڭ ا سەرياسىندا «ينتەر» قۇرامىندا سوڭعى ماۋسىمدا 29 گول سوعىپ ۇزدىك مەرگەندەر قاتارىنان كورىنگەن ماۋري يكارديدى المادى.
سول ليگادا «يۋۆەنتۋس» ءۇشىن 22 گول سوققان پاۋلو ديبالا بولسا قوسالقى قۇرامدا قالدى.
انگليا قۇراماسىنىڭ بۇرىنعى ويىنشىسى كريس ۆاددل ۆۆس Radio 5 live-قا بەرگەن سۇحباتىندا «ءبارى مەسسيگە ارناپ قۇرىلعان، ءبارى مەسسيمەن بايلانىستا جاسالادى، ءبىراق ءبارى مەسسيدىڭ قالاۋىنداي بولا المايدى» دەدى.
ارگەنتينا ساپىنداعى 126 ويىندا مەسسي 64 گول سوقتى. «بارسەلونامەن» بىرگە بارلىق تيتۋلدى يەلەنگەن ول ۇلتتىق قۇرامادا كۇمىس مەدال دا يەلەنگەن ەمەس. 2016 -جىلى امەريكا كۋبوگىنداعى ساتسىزدىكتەن سوڭ ول ۇلتتىق قۇرامادان كەتەتىنىن مالىمدەگەن بولاتىن. ءبىراق ەكى ايدان سوڭ قايتا ورالدى.
Baq.kz