مينيستر ابايەۆ بولاشاق جۋرناليستى جۇمىسقا ورنالاستىرۋعا مۇمكىندىك بەرەتىن بايقاۋ وتكىزبەك

استانا. قازاقپارات - ەلىمىزدىڭ جوعارى وقۋ ورىندارىنىڭ جۋرناليستكا فاكۋلتەتىندە وقيتىن ستۋدەنتتەر اراسىندا جۇمىسقا ورنالاسۋعا مۇمكىندىك بەرەتىن بايقاۋ ۇيىمداستىرىلادى.

بۇل تۋرالى بۇگىن مەديا ءبىلىم بەرۋدى دامىتۋ ماسەلەلەرى جونىندەگى ۆەدومستۆوارالىق كەڭەستە ق ر اقپارات جانە كوممۋنيكاتسيالار ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«ارينە، قازىرگى ۋاقىتتا جوعارى وقۋ ورىندارى بەرىپ جاتقان بىلىمگە كوڭىلىمىز تولادى. دەگەنمەن، كوپ جاعداي ستۋدەنتتەردىڭ وزدەرىنە دە بايلانىستى ەكەندىگىن تۇسىنەمىز. ەگەر بازالىق دۇنيەلەردى، پاندەردى وقىتۋشىلار ۇيرەتەتىن بولسا، قالعان ءبىلىم مەن داعدىنى دەربەس الۋ كەرەك. ونىڭ ۇستىنە ولاردىڭ مۇنداي مۇمكىنشىلىكتەرى دە بار»، - دەدى ول.

وسى رەتتە داۋرەن ابايەۆ اقپارات جانە كوممۋنيكاتسيالار مينيسترلىگى جۋرناليستيكا سالاسىنداعى ءبىلىم بەرۋدى دامىتۋ ماسەلەلەرىن تالقىلاۋعا جانە قاجەتتى جاردەم بەرۋگە دايىن ەكەندىگىن ايتتى.

«قازىر ءبىز ماسەلەلەردى قاراستىرىپ، تالقىلاۋعا دايىنبىز. ءبىر ايدان كەيىن «ۇركەر» سىيلىعىن تاپسىرار كەزدە سول ۋاقىتقا دايىن بولساق، بايقاۋ جاريالايمىز. بىلاي جاسايىق، بايقاۋ بولادى جانە باس رەداكتورلار، تەلەارنالاردىڭ، راديولار مەن گازەتتەردىڭ باسقارما وكىلدەرىنەن جاساقتالعان تورەشىلەر بايقاۋدان وتكەن ۇزدىك ستۋدەنتتى جۇمىسقا الۋعا مىندەتتەمە الادى. مەنىڭشە، بۇل شىنايى ءارى جاقسى بايقاۋ بولار ەدى. ستۋدەنت جوعارى وقۋ ورنىن بىتىرگەننەن كەيىن جۇمىسقا ورنالاسادى. مىنە، وسىنداي قايىرىمدى ءىس جاساي الامىز. كونكۋرستىڭ كريتەريلەرىن ازىرلەۋ قاجەت»، - دەدى مينيستر.