قازاق ۇلتتىق ونەر اكادەمياسى «كينو تانۋ» ماماندىعىن شەتەل تىلىندە وقىتپاق

الماتى. قازاقپارات - الماتىدا ت. جۇرگەنوۆ اتىنداعى قازاق ۇلتتىق ونەر اكادەمياسى «كينو تانۋ» ماماندىعىنا شاقىرادى، دەپ حابارلايدى قازاقپارات ءتىلشىسى.

ت. جۇرگەنوۆ اتىنداعى قاز ۇ ءو ا «ونەر تانۋ» فاكۋلتەتى، «كينو تاريحى مەن تەورياسى» كافەدراسىنىڭ وقىتۋشىسى دينا امىربەكوۆانىڭ ايتۋىنشا تالاپكەرلەرگە قويىلاتىن شارت كۇردەلەنە تۇسپەك.

«كينو تانۋ» ماماندىعىن بيىلدان باستاپ اعىلشىن تىلىندە جۇرگىزەتىن بولامىز. ءتىل بىلەتىن، سول تىلدە جازا، ويلانا الاتىن تالاپكەرلەرگە 8 گرانت ءبولىنىپ وتىر. ماقساتىمىز - ءتىلدى جەتىك مەڭگەرگەن ماماندار ارقىلى قازاق كينوسىن الەمگە تانىتۋ. جانە تاعى ءبىر جاڭالىعىمىز - كۇندىزگى بولىممەن قاتار عالامتور ارقىلى قاشىقتان وقىتۋدى ىسكە قوسامىز»، - دەيدى دانا امىربەكوۆا.

جاس تالاپكەرلەرمەن قاتار ەكىنشى، ءۇشىنشى ماماندىق الامىن دەۋشىلەرگە دە وقۋ ورنىنىڭ ەسىگى اشىق.

«مەكتەپ تۇلەكتەرىنىڭ ۇ ب ت-دان جيناعان «قازاق ءتىلى» مەن «قازاقستان تاريحى» پاندەرىنىڭ باللى ەسەپتەلىپ، وعان شىعارماشىلىق ەمتيحان كورسەتكىشى قوسىلادى. شىعارماشىلىق ەمتيحاننىڭ ءبىرىنشى كەزەڭىندە سۇراقتارعا جاۋاپ بەرۋ كەرەك، ەكىنشىسىندە فيلمگە تالداۋ، رەتسەنزيا جاسالادى»، - دەدى دانا امىربەكوۆا

كەشەندى تەستىلەۋ تاپسىراتىن تالاپكەرلەردىڭ قۇجاتتارى 23 -ماۋسىم ساعات 12:00-گە دەيىن قابىلدانادى.

25 -ماۋسىمنان باستاپ مەكتەپ تۇلەكتەرىنىڭ قۇجاتتارى قابىلدانا باستايدى.