ساپ تۇزەگەن پوليتسەيلەر «مەن قازاقپىن» ءانىن ورىندادى

استانا. قازاقپارات - فەيسبۋكتەگى ساپ تۇزەگەن پوليتسەي قىزمەتكەرلەرىنىڭ «مەن قازاقپىن» ءانىن ورىنداعان ۆيدەوسى جاريالاندى، دەپ حابارلايدى قازاقپارات.

ۆيدەوعا قاراعاندا، پوليتسيا قىزمەتكەرلەرى 23- ماۋسىم كۇنى وتەتىن ءتول مەرەكەلەرى پوليتسيا كۇنىنە دايىندالىپ جاتقان سىڭايلى. ويتكەنى، ولار ءان ءماتىنىن قاعازعا شىعارىپ الىپ نە بولماسا ۇيالى تەلەفوندارىنان وقۋ ارقىلى ىجداعاتپەن جاتتاپ جاتقاندىقتارى بايقالادى. ۆيدەونىڭ قاي وڭىردە تۇسىرىلگەنى بەلگىسىز.

ەستەرىڭىزگە سالا كەتسەك، بيىل 7- مامىر كۇنى جامبىل وبلىسىنداعى «وتار» اسكەري بازاسىنىڭ اۋماعىندا وتەتىن جاۋىنگەرلىك پاراد بارىسىندا «مەن قازاقپىن» ءانىن ءبىر مەزەتتە 3 مىڭ سارباز ورىنداعان بولاتىن.

پوليتسيا قىزمەتكەرلەرىنىڭ كاسىبي مەرەكەسى 1992-جىلعى 23- ماۋسىمدا قازاقستان رەسپۋبليكاسى جوعارعى كەڭەسى قابىلداعان «قازاقستان رەسپۋبليكاسى ىشكى ىستەر ورگاندارى تۋرالى» زاڭمەن تىعىز بايلانىستى. زاڭ قازاقستان پوليتسياسىنىڭ قىزمەتى مەن مىندەتىن ايقىندايتىن العاشقى قۇقىقتىق اكت بولىپ تابىلادى.

2007-جىلى 5- ماۋسىمدا «قازاقستان رەسپۋبليكاسى ىشكى ىستەر ورگاندارى تۋرالى» ق ر زاڭىنىڭ قابىلدانعانىنا 15 جىل تولۋىنا وراي، ەلباسى نۇرسۇلتان نازاربايەۆ 23- ماۋسىمدى پوليتسيا كۇنى دەپ بەكىتتى.