شەتەلگە شىعۋعا شەكتەۋ قويۋ: قارىز تولەنسە، ءۇش كۇندە رۇقسات بەرىلۋى كەرەك
ق ر ادىلەت ءمينيسترى مارات بەكەتايەۆتىڭ ايتۋىنشا، بۇرىن سوت ورىنداۋشىلارى شەكتەۋدى قاي كەزدە الىپ تاستايتىندارىن وزدەرى شەشەتىن. ەندى، زاڭ بويىنشا شەتەلگە شىعۋعا شەكتەۋدى الىپ تاستاۋدىڭ ناقتى مەرزىمى بەكىتىلدى.
«ءۇش جۇمىس كۇنى. وسى ۋاقىتتىڭ ىشىندە شەكتەۋدى الىپ تاستاۋى ءتيىس. ايتپەسە، بۇرىن قارىز تولەنسە دە، شەكتەۋ بىرنەشە اپتا بويى تۇراتىن. قازىر ونى الىپ تاستاۋ مەرزىمى زاڭمەن بەكىتىلدى. ماكسيمۋم ءۇش كۇن. ودان اسىپ كەتسە، سوت ورىنداۋشىلارىنا سانكسيا سالىنادى»، - دەدى م. بەكەتايەۆ حالىققا ەسەپ بەرۋ كەزدەسۋى كەزىندە.
ءمينيستردىڭ ايتۋىنشا، سوت شەشىمدەرىن ورىنداۋ شارالارى باستالعاندا قارىز بولعان ادامعا دا حابار بەرىلەدى. وسىلايشا، ول وزىنە قاتىستى ءتيىستى شارالاردىڭ قولعا الىنعانىن ءبىلىپ وتىرادى. «ايتپەسە، ول دا ۇلكەن پروبلەما بولاتىن. ادامدار بۇرىنعى مەكەن-جايلارى بويىنشا جىلجىمايتىن مۇلىككە قاتىستى قارىزدىڭ جينالىپ قالعانىن بىلمەي جۇرە بەرەتىن ەدى. ونى اۋەجايعا بارعاندا عانا ءبىلىپ، شەتەلگە شىعا المايتىن»، - دەپ اتاپ كورسەتتى م. بەكەتايەۆ.
ايتا كەتەيىك، كەزدەسۋ كەزىندە مينيستر سوت ورىنداۋشىلارىنىڭ قىزمەتىنە قاتىستى زاڭ جوباسىنىڭ پارلامەنتتىڭ قاراۋىندا جاتقانىن جەتكىزدى.
«اتاپ ايتقاندا، سوت ورىنداۋشىلارىنىڭ قىزمەتىنە سانكسيا سالۋدى قىسقارتۋ تۋرالى ۇسىنىس بار. بىلايشا ايتقاندا، اتالعان ينستيتۋتتى دامىتۋ شارالارى جالعاسا بەرەدى. سوت ورىنداۋشىلارىن جاۋاپكەرشىلىككە تارتۋ تەتىكتەرى دە قالادى. ءبىراق وكىلەتتىلىكتەردىڭ ءبىراز بولىگى سوتتان سوت ورىنداۋشىلارىنا بەرىلەدى»، - دەيدى م. بەكەتايەۆ.