فۋتبولدان ءا چ: سەربيا مەن شۆەيتساريانىڭ قايسىسى مىقتى؟

ورال. قازاقپارات - بۇگىن تۇندە كالينينگراد قالاسىندا ە توبىندا سەربيا مەن شۆەيتساريا قۇرامالارى كەزدەسەدى، دەپ حابارلايدى قازاقپارات ءتىلشىسى.

گەرمانيالىق فەليكس برىح تورەشىلىك ەتەتىن ويىن استانا ۋاقىتىمەن تۇنگى ساعات 00.00-دە باستالادى.

ءبىرىنشى تۋردا سەربيا قۇراماسى كوستا-ريكا قۇراماسىن 1:0 ەسەبىمەن تىزە بۇكتىرسە، شۆەيتساريا بەس مارتە الەم چەمپيونى برازيليامەن تەڭ وينادى (1:1). قازىرگى تاڭدا سەربيانىڭ قورجىنىندا 3، شۆەيتسارلىقتاردا 1 ۇپاي بولعانىمەن، ۆلاديمير پەتكوۆيچ شاكىرتتەرىنىڭ جاعدايى جامان ەمەس. ويتكەنى سوڭعى تۋردا شۆەيتساريا كوستا- ريكامەن كۇش سىناسسا، سەربياعا برازيلياعا توتەپ بەرۋگە تۋرا كەلەدى. سوندىقتان بۇل ەكىنشى جولداما ءۇشىن شەشۋشى ويىن دەپ ەسەپتەۋگە بولادى.

ەگەر ملادەن كرستايچ جاتتىقتىراتىن سەربيا قۇراماسى شۆەيتساريانى ۇتسا، 6 ۇپاي جيناپ، پلەي-وفف باسەكەسىنە جولداما الادى. شۆەيتسارياعا تەڭ ويىننىڭ ءوزى قولايلى بولۋى مۇمكىن. وندا شۆەيتسارلىقتارعا سوڭعى ويىندا كوستاريكالىقتاردى كەمىندە ەكى دوپ ايىرماسىمەن ۇتۋى كەرەك. بۇلاي بولىپ جاتسا، سەربيالىقتاردى برازيليالىقتارمەن تەڭ ويىن دا قۇتقارمايدى. سوندىقتان ولار ءۇشىن جەڭىستىڭ ءباسى جوعارى.

سوڭعى جەتى ويىندا سەربيا تەك ءبىر رەت جەڭىلىس تاۋىپ، بەسەۋىندە جەڭىسكە جەتكەن، ءبىر ماتچ تەڭ اياقتالعان. شۆەيتساريالىقتار جەتى ويىننىڭ تورتەۋىندە ۇتىپ، ۇشەۋىندە تارازى باسى تەڭ بولعان. بۇعان دەيىن قوس قۇراما ءوزارا كەزدەسكەن جوق.

كوماندالار شامامەن مىناداي قۇرامدا شىعۋى مۇمكىن. سەربيا: ستويكوۆيچ - يۆانوۆيچ، ميلەنكوۆيچ، توشيچ، كولاروۆ، ماتيچ، ميليۆويەۆيچ، ميلينكوۆيچ- ساۆيچ، ليايچ، تاديچ، ميتروۆيچ.

شۆەيتساريا: زوممەر - ليحتشتاينەر، شەر، اكاندجي، رودريگەس، بەحرامي، دجاكا، شاكيري، دجەمايلي، تسۋبەر، سەفەروۆيچ.

ايتا كەتەيىك، بۇل باسەكەگە دەيىن برازيليا - كوستا-ريكا ماتچىنىڭ ناتيجەسى انىقتالادى. ەگەر فۋتبول ماماندارى وسى توپتا وسالداۋ دەپ ەسەپتەپ جۇرگەن كوستاريكالىقتار ايدى اسپانعا شىعارىپ جاتسا، وندا ءتىپتى قىزىق بولادى.