استانالىق ستۋدەنت دونور ىزدەۋدىڭ سيفرلىق جۇيەسىن جاساپ شىعاردى

None
None
الماتى. قازاقپارات - الماتىدا Future-فورۋم «جاڭا تولقىن 100+» ستارتاپ بايقاۋىنىڭ جەڭىمپازدارى انىقتالدى. 4 جاس ستارتاپەردىڭ جوباسى ينۆەستورلار تاراپىنان قارجىلاندىرىلاتىن بولدى، دەپ حابارلايدى قازاقپارات ءتىلشىسى.

ونىڭ ىشىندە باربي ءۇيىنىڭ قازاقى بالاماسى ەكولوگيالىق تازا ماتەريالداردان جاسالعان قۇراما كيىز ءۇي، قاراعاندىلىقتار ۇسىنعان «Workapp» ەلەكتروندى پيك جوباسى، استانالىق ستۋدەنتتىڭ بارلىق دونورلىق پروتسەستى اۆتوماتتاندىرۋعا باعىتتالعان «Donormyn» جۇيەسى، پەتروپاۆلدىق ستۋدەنتتەر ويلاپ تاپقان «نوۆايا دوروگا» جوباسى جاقىن ارادا جۇزەگە اسىرىلاتىن بولادى.

«Donormyn» جوباسىنىڭ اۆتورى استانا مەديتسينالىق ۋنيۆەرسيتەتىنىڭ ستۋدەنتى رۋزي شيحوۆ. ەرىكتى دونورلاردىڭ سانى الەمدىك ستاندارتقا ساي بولماعاندىقتان، قان تاپشىلىعى وزەكتى پروبلەما بولىپ تۇر. سيفرلىق جۇيە وسى پروبلەمانى تولىعىمەن شەشپەك.

«مەن قىزىل جارتى اي قوعامىندا ەرىكتى بولىپ جۇمىس ىستەپ جۇرگەن كەزدە وسىنداي يدەيا تۋعان بولاتىن. باسىندا تەك موبيلدى قوسىمشا تۇرىندە جاساۋ ويدا بولدى. كەيىنىرەك ەكونوميكالىق ىقپالداستىق جانە دامۋ ۇيىمى ەلدەرىنىڭ (ە ى د ۇ) تاجىريبەسىن تالداي كەلە جوبانى كەڭەيتۋدى ءجون كوردىك. الەمدىك ستاندارت بويىنشا ەلدەگى ءبىرتۇتاس قان قىزمەتى جاسالادى. وعان الەۋمەتتىك جەلىلەر دە تىركەلەدى. ارنايى سايت اشىلادى. ءبىزدىڭ ماقساتىمىز دا قان تاپشىلىعىن جويۋ ءۇشىن مەملەكەتكە كومەكتەسۋ. رەسەيلىك Donor Search تەك قانا الەۋمەتتىك جەلىمەن جۇمىس جاسايدى. ءبىزدىڭ جۇيەدە دونور ىزدەۋ، قان تاپسىرۋ پروتسەسى تۇگەل اۆتوماتتاندىرىلعان. قازاقستاندا بۇل جوبانىڭ بالاماسى جوق»، - دەدى رۋزي شيحوۆ.

اتالعان بايقاۋعا وڭىرلەردەن 300 گە جۋىق يدەيادان 100 شاقتى ءوتىنىم ءتۇستى. ولاردىڭ 50 ءى ىرىكتەلىپ الىندى. 30 جوبا وڭىرلەردەن بولسا، قالعان 20-25 جوبا - الماتى وبلىسىنا تيەسىلى. ونىڭ ىشىنەن 13 مىقتى جوبا ينۆەستورلار نازارىنا ۇسىنىلدى.

«جاستار - الەۋمەتتىك يننوۆاتسيالىق يدەيالاردىڭ تاسىمالداۋشىسى. ولار ءبىلىم مەن پراگماتيزمگە، باسەكەگە قابىلەتتىلىككە ارقا سۇيەيدى. سوندىقتان، بيىل ناۋرىزدا قحا جانىنان «جاڭعىرۋ جولى» جاستار قوزعالىسى دۇنيەگە كەلدى. قوزعالىستىڭ پلاتفورماسىندا جاڭا قوعامدىق سانا- سەزىمدى قالىپتاستىرۋدىڭ، رۋحاني جاڭعىرۋدىڭ مىندەتتەرى ايقىندالىپ وتىر. ق ح ا 26-سەسسياسىندا ەلباسى جاستاردىڭ قوزعالىسى جاستاردى رۋحاني جاڭعىرۋدىڭ اينالاسىندا شوعىرلاندىرۋى تيىستىگىن ايتقان بولاتىن. سونىمەن قاتار، جاستاردىڭ وزەكتى ستارتاپ جوبالارىن قولداۋدىڭ ماڭىزدىلىعىن ايتتى. «جاڭا تولقىن 100+» فورۋمى اتالعان مىندەتتى ورىنداۋدىڭ نەگىزگى قادامى دەسەك بولادى»، - دەدى ق ح ا ءتوراعاسىنىڭ ورىنباسارى لەونيد پروكوپەنكو.

جاستاردىڭ جوباسىن رەسپۋبليكالىق ەتنومادەني بىرلەستىكتەردىڭ جەتەكشىلەرى، كاسىپكەرلەر، ساراپشىلار باعالادى.

لەونيد پروكوپەنكو اسسامبلەيا تاراپىنان بارلىق فيناليستەردىڭ جوبالارىنا مەملەكەتتىك قولداۋ تەتىكتەرىن تارتۋعا بارىنشا كۇش سالىناتىنىن ايتتى.

سوڭعى جاڭالىقتار