اقتوبەلىك شەبەر ءابىلقايىر حاننىڭ ءمورىن قايتا جاساپ شىقتى
شەبەر اقتوبە وبلىستىق تاريحي-ولكەتانۋ مۋزەيىنىڭ تاپسىرىسى بويىنشا ءمورى بار جۇزىك، قانجار مەن كۇمىس ءتوس بەلگىنىڭ كوشىرمەسىن جاساپ شىقتى.
بادام ءتارىزدى ءمورى بار جۇزىكتە اراب تىلىندە ءابىلقايىر حاننىڭ ەسىمى جازىلعان.
«مەن اقتوبە وبلىستىق تاريحي-ولكەتانۋ مۋزەيىنىڭ تاپسىرىسى بويىنشا كۇمىس جۇزىكتى ءابىلقايىر حاننىڭ ءمورىنىڭ سۋرەتىنە قاراپ وتىرىپ جاسادىم. سونداي-اق، تاپسىرىس بويىنشا قانجار مەن كۇمىس ءتوس بەلگىنى دە ازىرلەدىم. ءتوس بەلگىدە كىشى ءجۇز قازاقتارىنىڭ بىرلىگى - «ءۇش ارىس» بەلگىسى بار، ونىڭ اينالاسىندا 25 رۋلىق تايپا بەينەلەنگەن. بەلگىنىڭ جوعارعى جاعىندا اراب تىلىندە ءابىلقايىر حاننىڭ اتى مەن اتاعى - «ءابىلقايىر ءباھادۇر حان حازىرەتتى يبن سۇلتان» ويىلىپ جازىلعان»، - دەيدى شەبەر.
قانجار مەن ءتوس بەلگىنىڭ ديزاينىن شەبەردىڭ ءوزى جاساعان.
بۇل جادىگەرلەر بيىل جاڭا عيماراتقا كوشەتىن وبلىستىق تاريحي-ولكەتانۋ مۋزەيىنە بەرىلەدى.