ۇكىمەت باسشىسى ءبىلىم سالاسىن سىنعا الدى

None
None
استانا. قازاقپارات - بۇگىندە ءبىلىم بەرۋ باعدارلامالارى بويىنشا مىڭداعان ماماندار دايارلانادى. الايدا ەكونوميكاعا مۇلدەم باسقا ماماندار قاجەت، دەپ حابارلايدى قازاقپارات ءتىلشىسى.

«اشىعىن ايتۋ كەرەك، بۇگىندە ءبىلىم بەرۋ باعدارلامالارى بار. ءبىراز ماماندار دايارلانادى. الايدا ەل ەكونوميكاسىنا مۇلدەم باسقا ماماندار قاجەت. سوندا ۇسىنىس پەن سۇرانىس سايكەسپەيدى. وسى ورايدا ءبىز ەرلان كەنجەعالي ۇلىمەن (ءبىلىم ءمينيسترى - اۆت.) ىلعي داۋلاسىپ قالامىز. دەمەك، باعدارلامالار دۇرىس ەمەس، ءيا بولماسا، ءبىلىم بەرىپ جاتقاندار قاجەتتى نارسەنى بىلمەيدى. ادىستەمە دۇرىس ەمەس پە؟ ايتەۋىر، ەكونوميكاعا قاجەتتى كادرلاردى دايىندامايمىز»، - دەدى ۇكىمەت باسشىسى باقىتجان ساعىنتايەۆ «اتامەكەن» ۇلتتىق كاسىپكەرلەر پالاتاسىنىڭ V سەزىندە.

وسى ورايدا پرەمەر-مينيستر شىمكەنت قالاسىنداعى ءبىر زاۋىتقا جاساعان ساپارىن ەسكە الدى. سول كەزدە اتالعان كاسىپورىننىڭ اكسيونەرى جاڭادان قۇرىلعان 600 جۇمىس ورنىنا 100 ماماندى سىرتتان اكەلەتىنىن جەتكىزدى.

«مەن ايتامىن، نەگە ءوز ماماندارىمىزدى المايسىزدار؟ ونداي كادرلار جوق دەيدى. سوندا زاۋىت ەكى جىل سالىندى. ەكى جىلدا وعان قاجەتتى مامان دايىنداي المادىق پا؟ بايلانىس جاساپ، مامان دايارلاۋعا بولادى عوي. وسىعان بايلانىستى ءتيىستى تاپسىرما بەرىلدى. قازىرگى كەزدە ءبىلىم بەرۋ باعدارلامالارىن جاڭارتىپ جاتىر»، - دەپ اتاپ كورسەتتى ب. ساعىنتايەۆ.

ايتا كەتەيىك، سەزد كەزىندە ۇكىمەت پەن «اتامەكەن» ۇ ك پ اراسىندا جاڭا كەلىسىمگە قول قويىلدى. سەبەبى كەلەسى ايدا بەسجىلدىق كەلىسىمنىڭ مەرزىمى اياقتالادى. وسىعان بايلانىستى بيلىك كاسىپكەرلەر ۇيىمىنىڭ قۇرامىنان شىعادى. ال قازىرگى ارىپتەستىك جاڭا كەلىسىمنىڭ نەگىزىندە جالعاسادى.

«ەندى، وزدەرىڭىز جاقسى بىلەسىزدەر، نارەستە دۇنيەگە كەلگەندە اتا-اناسى ونى الپەشتەپ وسىرەدى. اياعىنا تۇرعانشا قامقورلىق جاسايدى. ال اياعىنا تۇرىپ كەتكەن بالانىڭ تۇيسىگى بولسا، ول اتا-اناسىنا قامقورلىق جاسايدى، وزىنە تىرەك بولادى. «اتامەكەن» بەس جىلدىڭ ىشىندە جىلداپ ەمەس، كۇندە ءوستى. بەس جىلدا ءجۇرىپ وتكەن جولىن قاراڭىزدار. بۇگىندە «اتامەكەن» ۇكىمەتتىڭ تىرەگىنە اينالدى. بەس جىل ءوتتى. ەندى، ءبىز ءوز وكىلەتتىگىمىزدى توقتاتىپ، قازاقشا ايتقاندا «اتامەكەننىڭ» ەنشىسىن ءبولىپ بەرىپ، ۇلكەن جولعا شىعارىپ وتىرمىز. ءبىزدىڭ ايتارىمىز، اق جول!»، - دەدى ق ر پرەمەر-ءمينيسترى باقىتجان ساعىنتايەۆ.

سوڭعى جاڭالىقتار