ب ۇ ۇ ميسسياسىنىڭ قازاقستاندىق بىتىمگەرلەر قۇرامىندا جاۋىنگەر قىزدار دا بولادى

استانا. قازاقپارات - ب ۇ ۇ ميسسياسىندا قازاقستاندىق بىتىمگەرلەر قۇرامىندا جاۋىنگەر قىزدار دا بولادى. بۇل تۋرالى قورعانىس ءمينيسترىنىڭ ورىنباسارى تالعات مۇحتاروۆ ءمالىم ەتتى، دەپ حابارلايدى قازاقپارات.

«بىتىمگەرلەر اراسىندا ايەلدەر قۇرامىنا توقتالساق، بۇل ب ۇ ۇ رەفورمالارىنىڭ ءبىرى بولىپ وتىر. وسى ورايدا ب ۇ ۇ تالابى مەن ماقساتتارى اراسىندا بايقاۋشى ايەلدەر سانىن ارتتىرۋ ەسكەرىلگەن جانە وسى كۋرس قازىرگى كەزدە ورىندالۋدا. ءبىز دە بۇل باعىتتا ءوتىنىم ءبىلدىرىپ، ءبىزدىڭ ەكى جاۋىنگەر قىزىمىز دايىندىقتان ءوتتى. سوندىقتان دا ولار ميسسياعا بارۋعا دايىن»، - دەدى تالعات مۇحتاروۆ ورتالىق كوممۋنيكاتسيالار قىزمەتىندە.

ايتا كەتەيىك، قازاقستاندىق روتا اتالعان ميسسياعا الداعى قاراشا ايىنا دەيىن جىبەرىلمەك.

«جىلىنا بىتىمگەرلىك روتاعا جۇمسالاتىن قارجى 340 ميلليون تەڭگەگە جۋىق سومانى قۇرايدى. وسى قارجى كولەمىنە ەڭبەكاقىنى تولەۋ مەن لوگيستيكا ەنىپ وتىر»، - دەدى ءمينيستردىڭ ورىنباسارى.

بۇدان بۇرىن حابارلانعانداي، بيىلعى 15- ماۋسىمدا پارلامەنت پرەزيدەنتتىڭ 40 وفيتسەردى ب ۇ ۇ ميسسياسىنا جىبەرۋ تۋرالى ۇسىنىسىن قولدادى.

قازاقستاننىڭ 120 عا جۋىق اسكەري قىزمەتشىسى ليۆانداعى ميسسياعا قاتىسادى.

بۇعان دەيىن ب ۇ ۇ ميسسياسىندا قازاقستان بىتىمگەرلەرىنە تولەنەتىن ەڭبەكاقى مولشەرى بەلگىلى بولعان ەدى.