قازاقستان مەن قىتاي بىرلەسىپ تۇسىرگەن فيلم الەمدىك پروكاتقا شىعادى
بۇل تۋرالى ق ر مادەنيەت جانە سپورت ءمينيسترى ارىستانبەك مۇحامەدي ۇلى حالىققا ەسەپ بەرۋ كەزدەسۋىندە ءمالىم ەتتى.
«جاقىندا عانا ەكى ەل باسشىلارىنا فيلمنىڭ ترەيلەرىن كورسەتتىك. شي جينپيڭ مەن نۇرسۇلتان نازاربايەۆ فيلمدى جوعارى باعالادى جانە شىعارماشىلىق ۇجىمعا العىس ايتتى. قىركۇيەك ايىندا «كومپوزيتور» فيلمى الەمدىك پروكاتقا شىعادى»، - دەدى مينيستر.
فيلمدە دارىندى كومپوزيتورلار باقىتجان بايقاداموۆ پەن شي جينحايدىڭ ەكىنشى دۇنيەجۇزىلىك سوعىس جىلدارىنداعى دوستىعى كورىنىس تابادى. باقىتجان بايقاداموۆتىڭ ءرولىن قازاقستاننىڭ تانىمال اكتەرى بەرىك ايتجانوۆ، ال شي جينحايدى قىتايدىڭ بەدەلدى اكتەرى حۋ دجۋن سومداعان. سونداي-اق، تۇسىرىلىمگە التىناي نوگەربەك، ارۋجان جازىلبەكوۆا سىندى قازاقستاندىق اكتريسالار قاتىسقان.
«ءبىز ءۇشىن حالىقارالىق كينونارىققا شىعۋ وتە ماڭىزدى. بۇعان دەيىن قازاقستاندىق فيلمدەر كينوفەستيۆالدەر مەن ارنايى كورسەتىلىمدەردە، قازاقستاندىق كينو كۇندەرىندە عانا حالىققا جول تارتاتىن. دەربەس پروكاتقا شىعارىلعان جوق. سوندىقتان، رەسەي، قىتاي، ا ق ش سياقتى ەلدەرمەن بىرلەسىپ ءونىم شىعارۋ ارقىلى ۇلتتىق كينومىزدى حالىقارالىق دەڭگەيگە شىعارعىمىز كەلەدى»، - دەپ ءسوزىن تۇيىندەدى مينيستر.