ءاسانالى ءاشىموۆتىڭ «ارۋاق» فيلمى ەۋرازيا كينو فەستيۆالىن اشادى
بۇل تۋرالى ق ر مادەنيەت جانە سپورت ءمينيسترى ارىستانبەك مۇحامەدي ۇلى حالىققا ەسەپ بەرۋ كەزدەسۋىندە حابارلادى.
«وتاندىق فيلمدەرگە ەرەكشە كوڭىل اۋدارۋىمىز كەرەك، بۇل باعىتتا مينيسترلىك اۋقىمدى جۇمىستار اتقارىپ كەلەدى. ءبىز ءوز تاريحىمىز تۋرالى فيلم تۇسىردىك. وسىلايشا ءبىز تۋرالى، ءبىزدىڭ تاريحىمىز تۋرالى تۇسىرىلگەن لاس فيلمدەر اعىنىن توقتاتا الدىق. سوڭعى 3-4 جىلدا رەسەيمەن بىرلەسىپ «28 پانفيلوۆشى» كارتيناسىن، «الماس قىلىش»، «اناعا اپارار جول»، «قۇنانباي»، «امانات»، ازيانىڭ ۇزدىك كارتيناسى اتانعان «ورالمان» فيلمدەرى ءتۇسىرىلدى. بيىلعى ەۋرازيا كينو فەستيۆالى ءاسانالى ءاشىموۆتىڭ «ارۋاق» فيلمىمەن اشىلادى»، - دەدى مينيستر حالىققا ەسەپ بەرۋ كەزدەسۋىندە.
ءمينيستردىڭ ايتۋىنشا، جىل سوڭىنا دەيىن «بالۋان شولاق»، «ارۋاق» فيلمدەرى جانە انيماتسيالىق «كۇلتەگىن»، «مۇزبالاق» جوبالارى قازاقستاندىق كينوپروكاتقا شىعادى.
سونىمەن بىرگە، قىركۇيەك ايىندا قازاقستان مەن قىتاي كينەماتوگرافيستەرىنىڭ تۇڭعىش بىرلەسكەن جوباسى - «كومپوزيتور» فيلمى الەمدىك پروكاتقا شىعادى.