كوزى تىرىسىندە ۇلگەرمەدىم: بويجەتكەن مارقۇم بولىپ كەتكەن جىگىتىنەن جۇكتى بولماق

استانا. قازاقپارات - اۋستراليادا ايلا كرەسسۋەلگە قاتىستى سوت پروتسەسى اياقتالىپ، وعان وزىنە قول جۇمساپ ولگەن جىگىتىنىڭ ۇرىعىن قولدانۋ ارقىلى جاساندى جولمەن جۇكتى بولۋعا رۇقسات بەرىلدى.

بۇل تۋرالى Newsweek باسىلىمىنا سىلتەمە جاساپ Stan.kz حابارلايدى.

سوت ءتوراعاسى براۋننىڭ سوزىنشە، ول كرەسسۋەل دۇنيەگە اكەلەتىن بالانىڭ «ماحابباتپەن، قامقورلىقپەن ءارى قولداۋمەن» وسەتىنىنە سەنىمدى.

سوتتىڭ مۇنداي وڭ شەشىمىنە قول جەتكىزۋ ءۇشىن، بويجەتكەنگە بۇرىنعى جىگىتى دجوشۋانىڭ بالالى بولعىسى كەلگەنىن جانە جالعىز ءوزى بالانى تاربيەلەۋگە پسيحولوگيالىق، فيزيكالىق جانە قارجىلىق تۇرعىدان دايىن ەكەنىن دالەلدەۋ كەرەك بولعان.

ايتا كەتسەك، بويجەتكەن 2016-جىلى 23- تامىزدا جىگىتىن ءولى كۇيىندە تاۋىپ العان. ولار 3 جىل شاماسىندا كەزدەسىپ جۇرگەن جانە بولاشاقتا شاڭىراق كوتەرىپ، بالالى بولۋدى جوسپارلاعان.

جاس جىگىت قايتىس بولعاننان كەيىن بويجەتكەن ونىڭ اتا-اناسىنا دجوشۋانىڭ كوزى تىرىسىندە جۇكتى بولىپ ۇلگەرمەگەنىن ايتىپ، شاعىمدانعان ەكەن. سول كەزدە ولار الداعى 24 ساعات ىشىندە دجوشۋانىڭ اتالىق ۇرىعىن الۋ تۋرالى سوتتىڭ شۇعىل شەشىمىن تالاپ ەتىپ، بيولوگيالىق ماتەريالدى ە ك و- عا ارنالعان كلينيكادا ساقتاۋدى ۇيعارعان.