ساحناعا مۇلدەم شىققىم كەلمەدى: توقتار سەرىكوۆ ونەردەن قول ۇزگەن جىلدارى قايدا بولعانىن ايتتى

None
None
استانا. قازاقپارات - حالىقتىڭ ىستىق ىقىلاسىنا بولەنگەن توقتار مەن بەيبىت ءبىر كەزدەرى ساحناعا مۇلدەم شىقپاي كەتتى.

4 جىل دەگەندە تىڭدارمانىمەن قايتا قاۋىشقان جۇپ وسى ۋاقىت ارالىعىندا قايدا بولدى؟ نەلىكتەن ساحناعا شىقپادى؟ تىڭدارماندى مازالاعان بۇل سۇراقتارعا سەرىكوۆ ءالى كۇنگە دەيىن تۇشىمدى جاۋاپ بەرگەن ەمەس، دەپ حابارلايدى Stan.kz اقپاراتتىق اگەنتتىگى.

ەل اراسىندا «توقتار دىنگە بەرىلىپ، سونىڭ سالدارىنان ونەردى تاستاپ كەتكەن» دەگەن اڭگىمە دە جەلدەي ەسكەن. الايدا ەل سۇيىكتىلەرىنىڭ حالىق الدىنا شىقپاۋىنىڭ وزىندىك سەبەبى باسقا.

«قازاقستان» ارناسىنىڭ «سەنبىلىك تاڭ» باعدارلاماسىنا بەرگەن سۇحباتىندا توقتار سەرىكوۆ ونەردەن قول ۇزگەن جىلدارى جايلى تولىق بايانداپ بەردى.

«ءبىز بالا-شاعامىز دۇنيەگە كەلىپ، اكەم ومىردەن قايتقاننان كەيىن ونەرگە دەگەن زاۋقىم سوقپاي قالعان جىلدار بولدى. قۇلازىدىم، ونەردەن ءبىرجولاتا كەتكىم كەلدى. سول كەزدە «سەن قالساڭ، مەن ءوزىم كەتە بەرەمىن» دەگەن بەيبىتتىڭ ءسوزى بولعان جوق. ەرىكسىز مەنىڭ ەتەگىمنەن ۇستاپ، ەرىپ ءجۇردى. «سەن كەتسەڭ، مەن دە قايدا بارامىن» دەپ بۇل دا توقتاپ قالدى. سول كەزدە ەكەۋمىز 3-4 جىل ساحنادان ۇزىلدىك. بىرەۋلەر «توقتار سەرىك ءدىننىڭ ارقاسىندا ونەردەن كەتىپ جاتىر ەكەن» دەپ شىعاردى. جوق، ولاي ەمەس. ونەرگە وكپەم جوق. ءبىراق ساحناعا مۇلدەم شىققىم كەلمەي قالدى.

ەڭ ۇلكەن سەبەپ - اكەمنىڭ دۇنيەدەن ءوتۋى. ول كىسى كەتكەننەن كەيىن ەسى كەتىپ بيلەپ، ءان ايتقىم كەلمەي، سەكىرىپ، تەرلەگىم كەلمەدى. قاسىمدا ول كىسى قاراپ تۇرعان سياقتى بولاتىنمىن. ءوزىمدى سالبىرت سەزىندىم. جاناشىر دوستارىم «ونەردەن كەتسەڭ، دالادا قالىپ قوياسىڭ عوي» دەپ بيزنەس اشىپ بەرگەندەرى دە بولدى. وعان دا زاۋقىم سوققان جوق»، - دەيدى سەرىكوۆ.

ونەر يەسىنىڭ قايتا اياققا تۇرۋىنا حالىقتىڭ ءوزى سەبەپ بولعان. سول شاقتا توقتاردى كورگەن جانداردىڭ انشىگە جولدايتىن ساۋالى بىرەۋ عانا ەدى.

«4 جىل ىشىندە كەزدەسكەن حالىقتىڭ ءبارى: «قايدا جۇرسىڭدەر؟ سەندەرگە نە بولدى سونشاما؟ ءبىز سەندەردى ىزدەپ ءجۇرمىز»، - دەپ بىزگە وكپە-رەنىشىن ايتتى. سودان قايتا كەلدىك. ايتقىم كەلگەنى، ءبىزدىڭ ىشىمىزدە ونەر بار ەكەن، و باستا دۇنيەگە كەلگەن كەزدە اكە-شەشەمىزدەن دارىعان ونەر دەگەن الەم بار ەكەن»، - دەپ اعىنان جارىلدى توقتار سەرىكوۆ.

سوڭعى جاڭالىقتار