ديماش تا، سامال دا قازاقستاندا قالىپتاستى - ارىستانبەك مۇحامەدي ۇلى
مينيستر كانن فەستيۆالىندە جەڭىسكە جەتكەن سامال ەسلياموۆا مەن قىتايداعى ءان بايقاۋىندا توپ جارعان ديماش قۇدايبەرگەنگە ەرەكشە توقتالدى.
«ديماش قىتايلاردىڭ ارقاسىندا، سامال - فرانسۋزداردىڭ ارقاسىندا تانىلدى دەگەن پىكىر حالىق اراسىندا بار. ديماش ءوزىنىڭ قازاقستاندا وسكەنىن، ۇلتتىق ونەر ۋنيۆەرسيتەتىندە وقيتىنىن قانشا ايتسا دا، ونى قىتايعا تەلىپ قوياتىندار تابىلادى. ەل اراسىندا سونداي قىزىق پسيحولوگيا قالىپتاسىپتى»، - دەدى ارىستانبەك مۇحامەدي ۇلى استانادا حالىق الدىندا ەسەپ بەرۋ كەزدەسۋىندە.
مينيستر رەسەيلىك ءانشى البينا جاڭابايەۆانىڭ جازباسىن مىسالعا كەلتىردى.
«رەسەيگە تانىمال ءانشى البينا دجانابايەۆا استراحان وڭىرىندە تۋعان، ونىڭ اكەسى قازاق، اداي رۋىنان. «Voice of Astana» كونسەرتىنە كەلگەندە البينا ءوز تالانتتارىمىزعا، باتىرحان شۇكەنوۆكە، بايعالي سەركەبايەۆقا قۇرمەتىمىزدى كورىپ، ريزا بولدى. ينستاگرام جەلىسىنە ءوزىنىڭ قازاق ەكەنىن، قازاقتان شىققانىن ماقتان تۇتاتىنىن جازدى، تاريحي وتانىنا سالەم جولدادى. شەتتەگى قازاقتاردىڭ ءوزى شىققان تەگىن مويىنداپ جاتقاندا، ءوز ەلىمىزدە وسكەن تالانتتاردى سىرتقا تەبۋ جارامايدى»، - دەدى ول.
«ديماش ءبارىبىر تانىمال ءانشى بولار ەدى. سەبەبى، كونكۋرستار الەمنىڭ بارلىق ەلىندە وتەدى. ءيا، قىتايعا بارعانى راس. ولاي باعالاساق، سەرىك ساپيەۆتى اعىلشىنداردىڭ كومەگىمەن تانىلدى دەپ ايتا الامىز با؟ دانيار ەلەۋسىنوۆ - ريو-دە-جانەيرودا، ولگا شيشيگينا - اۆستراليالىق كەنگۋرۋلاردىڭ ارقاسىندا قالىپتاستى دەي المايمىز عوي. وسى ءۇشىن حالىقارالىق بايقاۋلار مەن وليمپيادالار وتكىزىلەدى، تالانتتاردىڭ تانىلۋى ءۇشىن»، - دەدى ا. مۇحامەدي ۇلى.