تيموشەنكو: پرەزيدەنت سايلاۋىنا تۇسەمىن

استانا. قازاقپارات - ۋكراينالىق وپپوزيتسيالىق ساياساتكەر يۋليا تيموشەنكو پرەزيدەنت سايلاۋىنا كانديداتۋراسىن ۇسىناتىنىن مالىمدەدى.

2019-جىلى وتەتىن سايلاۋدا ول ءىس باسىنداعى پرەزيدەنت پەتر پوروشەنكوعا باسەكەلەس بولۋى مۇمكىن.

يۋليا تيموشەنكو 20- ماۋسىمدا Facebook تە جۇرگىزگەن تىكەلەي ەفيرىندە سايلاۋعا «اۆتوريتاريزممەن ويناپ كورۋ ءۇشىن ەمەس، ۋكراينانى اياعىنان تۇرعىزۋ ءۇشىن» تۇسەتىنىن ايتتى.

«مەن ءۇشىن پرەزيدەنت سايلاۋى - PlayStation ەمەس، ەل كۇتىپ وتىرعان ناقتى وزگەرىس» دەپ مالىمدەدى وپپوزيتسيالىق «باتكيۆشينا» پارتياسىنىڭ ليدەرى.

تيموشەنكو ەگەر پرەزيدەنت بولىپ سايلانسا، جاڭا كونستيتۋتسيا بويىنشا رەفەرەندۋم وتكىزەتىنىن ايتتى. «ەگەر پرەزيدەنت سايلاۋىندا جەڭسەم، وندا شىنايى قوعامدىق كەلىسىم رەتىندە، بيلىكتى ءبىر قولعا شوعىرلاندىرۋعا قارسى بىردەن ۋكراينانىڭ جاڭا كونستيتۋتسياسىن قابىلداۋدى ۇسىنىپ، رەفەرەندۋم وتكىزەمىن» دەدى يۋليا تيموشەنكو.

ول 2019-جىلدىڭ كۇزىنە بەلگىلەنگەن پارلامەنت سايلاۋى ەگەر ءوزى پرەزيدەنت بولىپ سايلانسا، جاڭا كونستيتۋتسيا بويىنشا وتكىزىلەتىنىن مالىمدەدى. تيموشەنكو قىرىمدى جانە ۋكراينانىڭ شىعىسىنداعى وبلىستاردى كيەۆتىڭ باقىلاۋىنا قايتارۋ كۇرەسىنەن باس تارتپايتىنىن ايتتى.

«ازاتتىق»