استانادا زاماناۋي بەسسايىستان الەم كۋبوگىنىڭ فينالى وتەدى

استانا. قازاقپارات - زاماناۋي بەس سايىستان الەم كۋبوگىنىڭ فينالىنا الەمنىڭ ۇزدىك سپورتشىلارى قاتىسادى، دەپ حابارلايدى قازاقپارات ءتىلشىسى.

زاماناۋي بەس سايىستان الەم كۋبوگىنىڭ فينالىنىڭ وتكىزىلۋىنە وراي ۇيىمداستىرىلعان باسپا ءسوز كونفەرەنسياسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى اتالعان سپورتتىڭ ەلىمىزدە قارقىندى دامىپ كەلە جاتقاندىعىن اتاپ ءوتتى.

«ق ر مادەنيەت جانە سپورت مينيسترلىگى اتىنان بارلىق قاتىسۋشىلار مەن جارىستىڭ قوناقتارىنا قازاقستانعا قوش كەلدىڭىزدەر دەگىم كەلەدى. قازاقستان العاش رەت قازىرگى بەس سايىستان الەم كۋبوگى فينالىن قابىلداپ جاتىر. ءوز اتىمنان حالىقارالىق وداققا ۇلكەن العىسىمدى ايتقىم كەلەدى. سوڭعى ۋاقىتتا بەس سايىس ەلىمىزدە قارقىندى دامىپ كەلەدى. قازىرگى ۋاقىتتا قازاقستان رەسپۋبليكاسى سپورتشىلارىنىڭ قورجىنىندا زاماناۋي بەس سايىس بويىنشا ازيا چەمپيوناتىنىڭ التىن مەدالى، جاستار اراسىنداعى الەم چەمپيوناتىنىڭ كۇمىس مەدالى، UIPM الەم كۋبوگى فينالىنىڭ قولا جۇلدەسى مەن ازيا چەمپيوناتىنىڭ كۇمىس مەدالى بار. مەن وسى جارىستا جاڭا ەسىمدەر پايدا بولادى دەگەن سەنىمدەمىن. بارلىق سپورتشىلارعا ساتتىلىك تىلەيمىن»، - دەدى ارىستانبەك مۇحامەدي ۇلى.

ءوز كەزەگىندە، زاماناۋي بەس سايىستان حالىقارالىق وداق پرەزيدەنتى كلاۋس شورمان، زاماناۋي بەس سايىستان الەم كۋبوگى فينالىن وتكىزەتىن مەملەكەتتى تاڭداۋدا قانداي نەگىزدەرگە سۇيەنگەندەرىن ايتىپ بەردى.

ۇلتتىق قۇرامانىڭ باس باپكەرى ۆاديم چۋدنوۆسكي قازاقستاندىق سپورتشىلاردىڭ باستى باسەكەلەستەرى مەن الەم كۋبوگىنا جالپى دايىندىق تۋرالى ايتتى.

ايتا كەتەيىك، قازىرگى بەس سايىستان الەم كۋبوگىنىڭ فينالى ماۋسىمنىڭ 21-24 ارالىعىندا «سارى ارقا» ۆەلوترەگى، «بارىس ارەنا» سپورت كەشەنى، «قازانات» اتشابارى بازالارىندا وتەدى. شارا استانا قالاسىنىڭ 20 جىلدىعىنا ارنالىپ وتىر. فينالعا الەمنىڭ ەڭ ۇزدىك سپورتشىلارىنىڭ تىزىمىنە ەنگەن 36 ەر جانە 36 ايەل سپورتشى كەلە جاتىر.

قازاقستان تاريحىندا زاماناۋي بەس سايىستان ەل ابىرويىن قورعاعان مىقتى سپورتشىلار بارشىلىق. اتاپ ايتقاندا، 1996-جىلى اتلانتادا وتكەن وليمپيادا ويىندارىندا الەكساندر پارىگين قازاقستاننىڭ قورجىنىنا التىن مەدال سالىپ بەرگەن بولاتىن.