قورعاستا قاۋىپسىزدىكتى قامتاماسىز ەتۋگە ارنالعان بوگەت سالىنادى

استانا. قازاقپارات - پارلامەنت سەناتىنىڭ جالپى وتىرىسىندا «ق ر ۇكىمەتى مەن ق ح ر ۇكىمەتى اراسىنداعى قورعاس وزەنىندە «شۇكىربۇلاق (المالى)» بىرلەسكەن سەل ۇستايتىن بوگەتىن سالۋداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات.

قورعاس - ۇلكەن ترانسشەكارالىق وزەن. بۇل ەكى ۇلكەن مەملەكەتتىڭ اراسىنداعى شەكارانى ايقىندايدى، ونىڭ ۇستىنە مىنەزى بار وزەن. ونىڭ تەك قانا قازاقستان جاعىنداعى بولىگىندە ۇلكەندى- كىشىلى كولدەر بار. وسى كولدەر كوكتەمگى سۋ تاسقىنى كەزىندە ەكى جاققا دا بىردەي قاۋىپ ءتوندىرۋى ابدەن مۇمكىن. ەكىنشىدەن، «قورعاس» - قازاقستانداعى ۇلكەن كەدەن بەكەتى. بۇدان اسا اۋقىمدى كولەمدە جۇك تاسىمالى وتەدى. ۇشىنشىدەن، كەدەن بەكەتىنىڭ تۇبىندە حالىقارالىق ماڭىزى بار اۋقىمدى قۇرعاق پورت دۇنيەگە كەلىپ وتىر. وسى سەبەپتەرگە بايلانىستى «قورعاس» وزەنى كوكتەمدە ەكى جاققا قاۋىپ توندىرمەۋى ءۇشىن مەملەكەتتەر اراسىندا ءتيىستى كەلىسىمگە قول قويىلعان»، - دەپ اتاپ ءوتتى مۇحتار قۇل-مۇحامەد.

اتاپ ايتقاندا، «قورعاس» وزەنىندەگى «شۇكىربۇلاق» بوگەتىنىڭ قۇرىلىسىن قازاقستان مەن قىتاي بىرلەسىپ قارجىلاندىرادى. وتكەن جىلدىڭ ماۋسىم ايىندا ءبىزدىڭ ۇكىمەت پەن قىتاي ۇكىمەتى اراسىندا «قورعاس» وزەنىندە «شۇكىربۇلاق» بوگەتىن بىرلەسىپ سالۋعا ارنالعان كەلىسىمگە قول قويىلدى. اتالعان بوگەت «قورعاس» حالىقارالىق ورتالىعىنىڭ قاۋىپسىزدىگىن قامتاماسىز ەتۋ ءۇشىن قاجەت. سەبەبى ورتالىق وتە جوعارى سەل مەن تاسقىن ءقاۋپى بار اۋماقتا ورنالاسقان.

بەلگىلى بولعانداي، قۇرىلىستىڭ جالپى سمەتالىق قۇنى 11,7 ميلليارد تەڭگە. بۇعان كەرەكتى قاراجات 2018-2020 -جىلدارعا ارنالعان رەسپۋبليكالىق بيۋدجەتتە قارالعان.