استانادا اسىق الاڭى سالىنىپ جاتىر

استانا. قازاقپارات - ەلوردادا جاڭادان سالىنىپ جاتقان گۇلزاردىڭ بىرىندە اسىق ويناۋعا ارنالعان الاڭ بولادى.

ءۇش شەڭبەردەن تۇراتىن ۇلتتىق ويىن الاڭى ءبىر مەزگىلدە 10 نان اسا ادامدى سىيدىرا الادى، دەپ حابارلايدى ەلوردا ينفو.

جاڭا گۇلزار پۋشكين كوشەسى، 15 ب مەكەن-جايى بويىنشا ورنالاسقان. بۇعان دەيىن ول جەردە ەكى قاباتتى اپاتتى جاعدايداعى كوپپاتەرلى تۇرعىن ءۇي بولعان-دى. 1961 -جىلى سالىنعان ۇيدە 18 وتباسى تۇرىپ كەلدى. 2015 -جىلى اتالعان ءۇي كۇرەلىپ، ونىڭ ورنىنا گۇلزار سالۋ تۋرالى شەشىم قابىلداندى.

گۇلزار اۋماعىندا بالالار الاڭدارى مەن سپورت الاڭى بولادى. دەنە شىنىقتىرۋعا ارنالعان ارنايى سپورتتىق جابدىقتار ورناتىلادى. جوبا بويىنشا گۇلزار قۇرىلىسى 30 -ماۋسىمعا دەيىن اياقتاۋى ءتيىس. مەردىگەر كومپانيا وكىلى مەدياحات تەمىربايەۆتىڭ ايتۋىنشا، بۇگىنگى كۇنى جۇمىستىڭ 90 پايىزى اياقتالدى.

«بۇيىرسا، مەرزىمىنەن بۇرىن تاپسىرامىز دەپ جوسپارلاپ وتىرمىز. قازىرگى كۇنى اعاشتار وتىرعىزىلىپ، گازون سەبىلىپ جاتىر. بۇل گۇلزاردىڭ ەرەكشەلىگى وندا ۇلتتىق ويىن اسىق ويىنىن ويناۋعا ارنالعان الاڭ بولادى. الاڭ ءۇش دەڭگەيلى شەڭبەردەن تۇرادى. ءبىز ءوز تاراپىمىزدان ءبىر وزگەرىس جاسايىق دەپ، اسىق الاڭىنىڭ جانىنا ويۋ سالدىق»، - دەدى ول.

گۇلزار اۋماعىنا ون ورىندىق ورناتىلادى. بۇگىنگى كۇنى بالالارعا ارنالعان ويىن قۇرالدارى اكەلىنە باستالدى.

«بالالار قۇرالدارى مەن ورىندىق جانە باسقا دا قوندىرعىلاردىڭ بارلىعى الماتى قالاسىندا جاسالىندى. ءجۇز پايىز وتاندىق ءونىم. بۇعان قوسا، گۇلزار اۋماعىنداعى جارىق شامدارىنىڭ بارلىعى قالالىق جارىق جەلىلەرىنە قوسىلعان. كۇن سايىن بەلگىلى ۋاقىتتا گۇلباق اۋماعىنداعى شامدار قوسىلىپ، سوندىرىلەتىن بولادى»، - دەدى مەردىگەر كومپانيا وكىلى.

ايتا كەتەيىك، استانا اكىمدىگى قالادا كۇرەلگەن اپاتتى ۇيلەردىڭ ورنىنا قالا تۇرعىندارى مەن قوناقتارىنىڭ سەرۋەندەپ جانە سپورتپەن شۇعىلدانۋىنا جاعداي جاساۋ ماقساتىندا جاڭا گۇلزارلار مەن بۋلۆارلار سالىپ جاتىر. اتاپ ايتقاندا، بيىل استانانىڭ 120 گەكتارداي جەرى قالالىقتارعا ساياباق پەن گۇلزار رەتىندە قايتارىلادى.