راحمون: ورتالىق ازيادا سۋ تاپشىلىعى تۋىنداي باستادى

استانا. قازاقپارات - تاجىكستان پرەزيدەنتى ەمومالي راحمون ورتالىق ازيا ەلدەرىندە سۋ تاپشىلىعى بايقالا باستاعانىن مالىمدەدى.

ازاتتىقتىڭ تاجىك رەداكسياسىنىڭ حابارلاۋىنشا، راحمون دۋشانبەدە ءوتىپ جاتقان سۋ ماسەلەلەرى جونىندەگى حالىقارالىق كونفەرەنسيادا ايماقتا ماۋسىمدىق جاۋىن-شاشىننىڭ از تۇسۋىنەن قۇرعاقشىلىق بولا باستاعانىن ايتتى.

«ماۋسىمدىق جاۋىن-شاشىننىڭ ازدىعىنان وزەن سۋلارىنىڭ كولەمى جىلدىق ورتاشا كورسەتكىشتەن الدەقايدا ازايدى، ال ماماندار سۋارۋ ماۋسىمىندا وزەن سۋلارىنىڭ كولەمى ءتيىستى نورمانىڭ 60-70 پايىزىنا عانا جەتەدى دەپ بولجايدى» دەدى تاجىكستان پرەزيدەنتى.

ونىڭ سوزىنشە، ورتالىق ازيا ەلدەرى ايماقتاعى مۇنداي ماسەلەلەردى ىنتىماقتاسا وتىرىپ جانە تىعىز بايلانىس ورناتۋ ارقىلى شەشۋى كەرەك.

ەمومالي راحمون سونىمەن قاتار سوڭعى جىلدارى عالامدىق كليماتتىڭ جىلىنۋى ورتالىق ازيا ەلدەرى مەن تاجىكستاننىڭ تابيعاتىنا جانە الەۋمەتتىك-ەكونوميكالىق جاعدايىنا دا اسەر ەتكەنىن ايتتى.

«سوڭعى 60 جىلدا تاجىكستاندا جىلدىق ورتاشا تەمپەراتۋرا ءبىر گرادۋسقا جوعارىلادى، ستيحيالىق گيدرومەتەورولوگيالىق قۇبىلىستار دا ءجيى جانە قارقىندى جۇرە باستادى. سوڭعى بىرنەشە ونداعان جىلدا تاجىكستاندا 1 مىڭعا جۋىق شاعىن جانە ورتاشا مۇزدىق ەرىپ كەتتى» دەدى ەمومالي راحمون.

تاجىكستان ۇكىمەتىنىڭ باستاماسىمەن جانە ب ۇ ۇ قولداۋىمەن ءوتىپ جاتقان ءوتىپ جاتقان كونفەرەنسيا 22- ماۋسىمعا دەيىن بولادى. كونفەرەنسياعا 110 مەملەكەت پەن حالىقارالىق ۇيىمداردىڭ وكىلدەرى قاتىسىپ جاتىر.