ا ق ش سەناتورلارى رەسەيگە ساپارلاپ بارۋى مۇمكىن

استانا. قازاقپارات - ا ق ش- تىڭ ماسكەۋدەگى ەلشىلىگى تاياۋ ۋاقىتتا امەريكالىق ءبىر توپ سەناتور رەسەيگە كەلىسسوز جۇرگىزۋگە كەلەتىنى تۋرالى اقپاراتتى ءيا راستاپ، ءيا تەرىسكە شىعارمادى دەپ حابارلايدى ازاتتىقتىڭ ورىس رەداكسياسى.

ەلشىلىك باسپا ءسوز حاتشىسىنىڭ ازاتتىققا بەرگەن كوممەنتاريىندە «امەريكالىق كونگرەسسمەندەر رەسمي ساپارى تۋرالى وزدەرى حابارلايتىنى» ايتىلعان. ەلشىلىك سونىمەن قاتار ا ق ش- تىڭ رەسەيدەگى ەلشىسى دجون حانتسمان ا ق ش كونگرەسسى وكىلدەرىنىڭ رەسەيگە ساپارىن قوشتايتىنىن جانە «امەريكالىق ديپلوماتيالىق ميسسيا باسشىسى رەسەي بيلىگىمەن ديالوگتى ازايتۋدى ەمەس، كەرىسىنشە، كۇشەيتۋدى قولدايتىنىن» ايتادى.

ا ق ش سەناتورلارىنىڭ رەسەيگە ساپارلاپ باراتىنى تۋرالى وتكەن اپتادا Washington Post باسىلىمى حابارلاعان. باق اقپاراتىنا قاراعاندا، سەناتورلار ساپارىن ەلشى حانتسماننىڭ ءوزى ۇيىمداستىرادى، ال ساپار ا ق ش پەن رەسەي پرەزيەنتتەرىنىڭ كەلەشەكتەگى كەزدەسۋىنە دايىندىقتىڭ ءبىر كەزەڭى بولۋى مۇمكىن.

رەسەي مەملەكەتتىك دۋماسىنىڭ حالىقارالىق ىستەر كوميتەتىنىڭ ءتوراعاسى لەونيد سلۋتسكي مەن فەدەراتسيا كەڭەسى حالىقارالىق ىستەر كوميتەتىنىڭ ءتوراعاسى كونستانتين كوساچيەۆ رەسەيلىك اگەنتتىكتەرگە سەناتورلاردىڭ 30- ماۋسىمدا سانكت-پەتەربۋرگكە كەلەتىنىن حابارلاعان. شىلدەنىڭ باسىندا سەناتورلار ماسكەۋدە رەسەي بيلىگى وكىلدەرىمەن كەزدەسپەك.

Washington Post مالىمەتىنشە، رەسەيگە سەناتورلار ريچارد شەلبي، دجون نيلي كەننەدي مەن دجون حۋۆەن بارادى. بۇل ءۇش سەناتور پرەزيدەنت دونالد ترامپتىڭ رەسپۋبليكاشىل پارتياسىنان سايلانعان. باسىلىم دەرەككوزىنىڭ مالىمەتىنشە، سەناتورلار رەسەيگە ول ەلدە «نە بولىپ جاتقانىن ءبىلىپ قايتۋعا» بارماق.