پولشا مەن قازاقستان اراسىنداعى تاۋار اينالىمى ءوستى

استانا. قازاقپارات - قازاقستان مەن پولشا كولىك-لوگيستيكا، اۋىل شارۋاشىلىعى، قۇرىلىس، ينفراقۇرىلىمدى دامىتۋ، سيفرلىق ەكونوميكا سالاسىنداعى ىنتىماقتاستىقتى دامىتادى، دەپ حابارلايدى قازاقپارات ءتىلشىسى.

وتكەن جىلى ەكى ەل اراسىنداعى تاۋار اينالىمى كولەمى 1 ميلليارد دوللارعا دەيىن وسكەن.

«بيىلعى جارتىجىلدىقتا دا ەكى ەل اراسىنداعى تاۋار اينالىمىنىڭ ءوسۋ قارقىنى بايقالدى. قازاقستان مەن پولشا قارىم-قاتىناسى ءوزارا ءتيىمدى ىنتىماقتاستىققا نەگىزدەلگەن. ءبىزدىڭ ەلىمىزدە 200 گە جۋىق پولشالىق كومپانيا جۇمىس ىستەيدى. پولشا كاسىپكەرلەرىنىڭ قازاقستانعا قۇيعان ينۆەستيتسياسى 200 ميلليون دوللارعا جەتتى»، - دەدى ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو قازاقستان- پولشا VIII ۇكىمەتارالىق وتىرىسىنىڭ قورىتىندىسىنا ارنالعان باسپا ءسوز ءماسليحاتىندا.

ۆيتسە-مينيستر شىمكەنتتەگى حيمفارم زاۋىتىنا 120 ميلليون دوللار ينۆەستيتسيالاعان Polpharma كومپانياسىن، قۇرعاق قۇرىلىس قوسپالارىن شىعاراتىن Selena ۇجىمىن ەرەكشە اتاپ ءوتتى.

«استانادا ءوتىپ جاتقان تاۋ-كەن كونگرەسى، قازاقستان-پولشا ەكونوميكالىق فورۋمى، ۇكىمەتارالىق وتىرىس سىندى شارالار اراداعى ساۋدا-ەكونوميكالىق قارىم-قاتىناستارىن نىعايتۋعا سەپتىگىن تيگىزەدى. قازاقستاننىڭ ەكونوميكالىق ىنتىماقتاستىق ەلدەرى ازاماتتارى ءۇشىن ەنگىزگەن ۆيزاسىز رەجىمى جانە Lot polish airlines اۋە كومپانياسىنىڭ استانا-ۆارشاۆا، ۆارشاۆا-استانا تىكەلەي رەيستەرى دە ىقپال ەتەدى»، - دەپ ءوز ءسوزىن تۇيىندەدى ۆيتسە-مينيستر.

ءوز كەزەگىندە پولشا كاسىپكەرلىك جانە تەحنولوگيالار ءمينيسترىنىڭ ورىنباسارى تادەۋش كوستسينسكي قازاقستانداعى پولشا كاسىپكەرلەرىنىڭ كوبەيەتىنىنە سەنىم ءبىلدىردى.

«قازاقستاندا تاۋ- كەن رەسۋرستارى وتە كوپ جانە بۇل سالادا ەلەۋلى جاڭعىرۋ جۇمىستارى ءجۇرىپ جاتىر. وسى ورايدا پولشا قازاقستانعا كومەكتەسكىسى كەلەدى جانە تاۋ-كەن ونەركاسىبىنە ارنالعان زاماناۋي ماشينالارىن ۇسىنادى»، - دەدى تادەۋش كوستسينسكي.