شاعىن قالا مەن اۋىل دارىگەرىنىڭ جالاقىسى تەڭەستىرىلمەك

استانا. قازاقپارات - شاعىن قالا مەن اۋىل دارىگەرىنىڭ جالاقىسىن تەڭەستىرۋ قاجەت. مۇنداي ۇسىنىستى بۇگىن ق ر پارلامەنتى سەناتىندا وتكەن جەرگىلىكتى وكىلدىك ورگاندارمەن ءوزارا ءىس-قيمىل جونىندەگى كەڭەس وتىرىسىندا سەناتور ەرىك سۇلتانوۆ جاسادى، دەپ حابارلايدى قازاقپارات ءتىلشىسى.

«شاعىن قالالاردا پروبلەمالار بار. ول جاقتا بيۋجەتتىك سالا قىزمەتكەرلەرى اۋىلدىق جەرلەردەگى قىزمەتكەرلەردەن 25 پايىزعا تومەن جالاقى الادى. ءبىراق، شاعىن قالالارداعى ەڭبەك جانە ءومىر ءسۇرۋ جاعدايلارىنىڭ اۋىلدىق جەردەن ايىرماشىلىعى جوق. بۇگىندە سولتۇستىك قازاقستان وبلىسىنىڭ ءبىرقاتار قالاسىندا، مەنىڭشە، كوپتەگەن وبلىستاردا دارىگەر تاپشىلىعى سىندى ۇلكەن پروبلەما بار. ويتكەنى، جالاقى ايىرماشىلىعى 25 پايىزدى قۇرايدى. دارىگەرلەر اۋدان ورتالىعىندا جۇمىس ىستەۋدەن باس تارتىپ، 5 شاقىرىم جەردەگى اۋىلعا بارادى. س ق و- دا مۇنداي 4 قالا بار»، - دەدى سەناتور.

ونىڭ اتاپ وتۋىنشە، بۇل پروبەلمانى شەشۋ قاجەت جانە وعان ايتارلىقتاي مول قاراجات قاجەت ەمەس.

ال ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆانىڭ ايتۋىنشا، قازىرگى ۋاقىتتا شاعىن قالالارداعى دارىگەرلەردىڭ دە جالاقىسىنا ۇستەمەاقى قوسۋ ماسەلەسى قاراستىرىلىپ جاتقانىن ايتتى.

«شىندىعىندا دا اۋىلدىق جەرلەردەگى قىزمەتكەرلەردىڭ ۇلكەن ارتىقشىلىعى بار. ولارعا 25 پايىز ۇستەمەاقى بولەنەدى. بۇعان قوسا، جەرگىلىكتى اتقارۋشى ورگاندار وتىن ساتىپ الۋلارىنا نەمەسە كوممۋنالدىق قىزمەتتەردى تولەۋىنە الەۋمەتتىك قولداۋ كورسەتىپ وتىرادى. بۇگىندە ءدال وسى نورمانى شاعىن قالالار ءۇشىن قارالىپ جاتىر»، - دەدى سۆەتلانا جاقىپوۆا.