وبلىس ورتالىعىن تۇركىستانعا كوشىرۋدىڭ جەرگىلىكتى حالىق ءۇشىن ماڭىزى زور

تۇركىستان. قازاقپارات - تۇركىستان قالاسىن وبلىس ورتالىعىنا كوشىرىپ، اتاۋىن تۇركىستان دەپ قالدىرۋ - ۇلكەن تاريحي وقيعا.

تۇركىستان قالالىق اقساقالدار القاسىنىڭ ءتوراعاسى، پاراسات وردەنىنىڭ يەگەرى جارىلقاسىن ازىرەتبەرگەن ۇلى وسىلاي دەپ پىكىر ءبىلدىردى، دەپ حابارلايدى قازاقپارات.

«جالپى تۇركىستاننىڭ وبلىس ورتالىعى اتانۋى - قالا تۇرعىندارى عانا ەمەس، بۇكىل قازاق ەلى ءۇشىن قۋانىشتى جاڭالىق. سەبەبى، تۇركىستان - قازاق مەملەكەتىن، قازاق حاندىعىن قۇرۋدا ۇلكەن ءرولى بار قالا. ق ر پرەزيدەنتى ن. نازاربايەۆتىڭ شەشىمىمەن تۇركىستان قالاسىن وبلىس ورتالىعىنا كوشىرۋى - ءبىز ءۇشىن ماڭىزى زور تاريحي وقيعا. تۇركىستاننىڭ وبلىس اتاۋى رەتىندە قايتا جاڭعىرىپ جاتقانى ءبىزدى قۋانتادى»، - دەيدى جارىلقاسىن ازىرەتبەرگەن ۇلى.

ونىڭ ايتۋىنشا، تۇركىستان قازاق حاندىعىنىڭ 550 جىلدىعىنىڭ استاناسى بولعان كيەلى مەكەن. ەلباسىمىز تۇركىستاندى «بۇكىل تۇركى حالىقتارىنىڭ رۋحاني استاناسى» دەپ اتادى. بۇل اتاۋ تۇركىستان قالاسىنا ۇلكەن ابىروي جانە سونىڭ ارقاسىندا بۇكىل تۇركى تىلدەس حالىقتارمەن بايلانىسىمىز ارتا تۇسپەك.

«حان ورداسى بولعان تۇركىستان وبلىس ورتالىعى رەتىندە قازاقتىڭ وركەندەۋىنە ءوز ۇلەسىن قوسا الادى. تۇركىستان حالقىنىڭ اتىنان ق ر پرەزيدەنتى ن. نازاربايەۆقا تۇركىستان قالاسىن وبلىس ورتالىعىنا كوشىرگەنى ءۇشىن مىڭ دا ءبىر العىس ايتامىن!»، - دەدى اقساقالدار القاسىنىڭ ءتوراعاسى.

ەستەرىڭىزدە سالا كەتەيىك، كەشە ەلباسى ن. نازاربايەۆ شىمكەنتكە رەسپۋبليكالىق ماڭىزى بار قالا مارتەبەسىن بەرۋ جانە وبلىس ورتالىعىن تۇركىستان قالاسىنا كوشىرۋ تۋرالى جارلىققا قول قويعان بولاتىن.