تۇركىستان وبلىسى جاستار ءۇشىن جاڭا مۇمكىندىك ەكەنىن ءتۇسىنۋ كەرەك - قۋانىش سۇلتانوۆ
«ەڭ باستىسى، پرەزيدەنت ەلىمىزدىڭ ءوسىمى مەن دامۋى جولىندا ساياسي شەشىم قابىلدادى. قىسقا مەرزىمدە بىزدە ءۇشىنشى مەگاپوليس پايدا بولىپ جاتىر. بۇدان بۇرىن بىزدە ميلليون تۇرعىنى بار الماتى قالاسى عانا بار ەدى. وتكەن ۋاقىتتىڭ ىشىندە استانا، ال ەندى شىمكەنت بۇل مەجەنى باعىندىردى. تۇركىستان وبلىسى ءوسىم ءۇشىن جاڭا مۇمكىندىك. اتاپ ايتقاندا، جاس بۋىن ءۇشىن جاڭا مۇمكىندىكتەر اشىلادى»، - دەپ توقتالدى ق. سۇلتانوۆ.
وسى ورايدا دەپۋتات تۇركىستان وبلىسىندا تۋريزمدى، اۋىل شارۋاشىلىعىنىڭ بارلىق باعىتتارىن، ونەركاسىپ سالاسىن دامىتۋ ءۇشىن تىڭ قادامدار ىسكە اسىرىلاتىنىن جەتكىزدى.
قۋانىش سۇلتانوۆتىڭ اتاپ وتۋىنشە، الداعى ۋاقىتتا مەملەكەت باسشىسىنىڭ جارلىعى نەگىزىندە بارلىق قاجەتتى نورماتيۆتىك قۇجاتتار قابىلداناتىن بولادى.
بۇدان بۇرىن حابارلانعانداي، ەلباسى نۇرسۇلتان نازاربايەۆ تۇركىستان وبلىسىنىڭ پايدا بولۋىنا بايلانىستى پىكىر ءبىلدىردى.
سونىمەن قاتار، پرەزيدەنت جاڭا وبلىس ورتالىعىنىڭ قۇرىلۋىنا بايلانىستى ءبىرقاتار تاپسىرمالار جۇكتەدى.