شىمكەنت ءوز مۇمكىندىگىمەن ارى قاراي دامۋعا قاۋقارلى - ازات پەرۋاشەۆ

استانا. قازاقپارات - جاڭا وبلىس ورتالىعىنىڭ قۇرىلۋى وڭتۇستىك ءوڭىردىڭ دامۋىنا ەرەكشە اسەر ەتەدى. بۇل تۋرالى ءماجىلىستىڭ جالپى وتىرىسىنان كەيىن تىلشىلەرگە دەپۋتات ازات پەرۋاشەۆ ايتتى، دەپ حابارلايدى قازاقپارات.

«كەشەگى تاريحي شەشىممەن بارشا قازاقستان حالقىن قۇتتىقتايمىن! بۇل ءوز كەزەگىندە ەلىمىز ءۇشىن ۇلكەن قۋانىش. راسىندا دا، بۇل باعىتتاعى قادامدار وڭتۇستىك ءوڭىرىمىزدىڭ دامۋىنا ەرەكشە اسەر ەتەدى دەگەن سەنىمدىمىن. ەگەر دە شىمكەنت قالاسىنا توقتالاتىن بولساق، تۇرعىندار سانى ميلليونعا جەتكەن مەگاپوليستەر ءوز مۇمكىندىكتەرىنە سۇيەنىپ، ارى قاراي دامۋعا قاۋقارلى بولادى. وعان ەشقانداي كۇمان جوق. مۇنداي شاھارلار اكىمشىلىك ءارى ساياسي قولداۋسىز دا ءوزىن-ءوزى قامتاماسىز ەتە الادى»، - دەپ توقتالدى ازات پەرۋاشەۆ.

وسى ورايدا دەپۋتات ەلباسىنىڭ 19- ماۋسىمدا قول قويعان جارلىعى وتە جۇيەلى ءارى قاجەتتى شەشىم ەكەنىن اتاپ ءوتتى.

«تۇركىستان ءبىزدىڭ رۋحاني ورتالىعىمىز دەپ ايتۋعا بولادى. بۇل قالاعا ساياسي ماعىنا بەرىپ، ونى جاڭا دارەجەگە كوتەرۋ ارقىلى وسى ءوڭىردىڭ تۇرعىندارىنا ۇلكەن تابىس بولادى دەپ بىلەمىز. مۇنىمەن قوسا، تۇركىستان وبلىسىنىڭ پايدا بولۋى دۇنيەجۇزىندەگى تۇركى حالىقتارى اراسىندا قازاقستاننىڭ ءرولىن، ورنىن جاڭا بەلەسكە شىعارادى دەپ سەنەمىن»، - دەپ ءتۇيدى ا. پەرۋاشەۆ.

بۇدان بۇرىن حابارلانعانداي، ەلباسى نۇرسۇلتان نازاربايەۆ تۇركىستان وبلىسىنىڭ پايدا بولۋىنا بايلانىستى پىكىر ءبىلدىردى.

سونىمەن قاتار، پرەزيدەنت جاڭا وبلىس ورتالىعىنىڭ قۇرىلۋىنا بايلانىستى ءبىرقاتار تاپسىرمالار جۇكتەدى.