اسىلى وسمان: تۇركىستان - ءيىسى تۇرىكتىڭ جان- جۇرەگى

الماتى. قازاقپارات - عالىم- فيلولوگ اسىلى وسمان قازاقپارات تىلشىسىنە تۇركىستاننىڭ تورگە وزۋى قازاقتىڭ عانا ەمەس، ءيىسى تۇرىكتىڭ قۋانىشى ەكەنىن ايتىپ بەردى.

وڭتۇستىك قازاقستان وبلىسى تۇركىستان توپىراعىنىڭ تۋماسى عالىم- فيلولوگ اسىلى وسمان: «ەلباسىنىڭ تۇركىستاندى وبلىس ورتالىعى ەتۋ تۋرالى جارلىعى توبەمدى كوكە جەتكىزدى»، - دەيدى.

«التى قازاقتىڭ بىرەۋى قايماعى بۇزىلماعان وڭتۇستىكتە تۇرادى. تۇركىستاننىڭ تورگە وزۋى ءبىزدىڭ عانا ەمەس، ءيىسى تۇرىكتىڭ رۋحىن اسقاقتاتتى. بۇل قۋانىشتىڭ ماعجان جۇمابايەۆتىڭ 125 جىلدىعىمەن قاتار كەلۋىنىڭ ءوزى عانيبەت. ول كەزدەيسوقتىق ەمەس، حالقىمىزدىڭ ادال نيەتى. ەلباسىمىزدىڭ ەرەن ەڭبەگىنىڭ ارقاسى. البەتتە، مۇنىڭ ءبارى تاۋەلسىزدىگىمىزدىڭ جەمىسى»، - دەدى اسىلى وسمان.

«تۇركىستان - ەكى دۇنيە ەسىگى عوي،

تۇركىستان - ەر تۇرىكتىڭ بەسىگى عوي.

تاماشا تۇركىستانداي جەردە تۋعان

تۇرىكتىڭ ءتاڭىرى بەرگەن نەسىبى عوي»، - دەپ جىرلاعان ماعجان جۇمابايەۆتىڭ تۋعانىنا بيىل 125 جىل تولىپ وتىر.

«اباي اقىلدىڭ اقىنى بولاتىن بولسا، ماعجان اقىنداردىڭ اقىنى. ماعجان ءومىر بويى تۇرىك دەپ وتكەن. «ەرتەدە تۇركىستاندى تۇران دەسكەن، تۇراندا ەر تۇرىگىم تۋىپ- وسكەن» دەگەن ماعجاننىڭ تۇرىكشىلدىگى، وتانسۇيگىشتىگى، ەل بىرلىگىن اڭساعان ارمانى، تىلەگى وسى ولەڭىندە جاتىر»، - دەپ ءسوزىن تۇيىندەدى اسىلى وسمان.

كەزىندە ستاليندىك ساياساتتىڭ امىرىمەن قازاقستانعا وتباسىمەن جەر اۋدارىلعان اسىلى ءالي قىزىنىڭ بالالىق شاعى تۇلكىباس اۋدانىندا وتكەن. ول تۇركىستان پەدۋچيليشەسىندە ءبىلىم العانىن ماقتانىشپەن ايتادى.

«تۇركىستان رەسپۋبليكاسىن قۇرۋ اتا-بابامىزدىڭ ارمانى بولاتىن. مۇستافا شوقاي، ءاليحان بوكەيحانوۆ، تۇرار رىسقۇلوۆتاردىڭ قالاۋى بۇگىن ورىندالىپ جاتىر. تۇركىستان اۋليەلەر جاتقان جەر، ەڭ اقىرى ابىلاي حانىمىز دا وسىندا جەرلەنگەن. تاياق قاداساڭ تال بولاتىن، شىبىق شانىشساڭ شىنار بولاتىن، اۋاسى تازا، سۋى تۇنىق وڭتۇستىكتىڭ قاسيەتتى ەكەنىنە داۋ جوق»، - دەدى اسىلى وسمان.

قوعام قايراتكەرى قادامنىڭ ءساتتى باستالعانىنا، تۇركىستاننىڭ تۇركى جۇرتىنىڭ رۋحاني استاناسى بولاتىنىنا سەنىم ءبىلدىردى.

«كارىس ۇلتى وكىلىنىڭ كەنتاۋدى ەكىنشى شۆەيتساريا دەگەنىن ەستۋىم بار. تۇلكىباستى ءبىرىنشى قىرىم دەر ەدىم. تۇركىستاننان 60 شاقىرىمداي جەردە ۋكاشا اتا دەگەن اۋليەلى مەكەن بار. ەندىگى ارمان قازاقتىڭ كوپ جينالعان جەرى وسى تۇركىستان بولسا، كەلەشەك رۋحاني استانامىز بولىپ، ورىستەيتىتىنە كامىل سەنەمىن»، - دەپ ءسوزىن اياقتادى اسىلى وسمان

ايتا كەتۋ كەرەك، ەلباسىمىز نۇرسۇلتان نازاربايەۆتىڭ جارلىعىمەن وڭتۇستىك قازاقستان وبلىسىنىڭ اكىمشىلىك ورتالىعى شىمكەنت قالاسىنان تۇركىستان قالاسىنا كوشىرىلىپ، شىمكەنت قالاسى رەسپۋبليكالىق ماڭىزى بار قالالاردىڭ ساناتىنا جاتقىزىلعان ەدى.