استانانى جوسپارلاعان جاپوندىق ساۋلەتشىنىڭ ارتىقشىلىعى نەدە - نازاربايەۆتىڭ جاۋابى

استانا. قازاقپارات - پرەزيدەنت نۇرسۇلتان نازاربايەۆ «كازاحستانسكايا پراۆدا» گازەتىنە بەرگەن سۇحباتىندا استانا قالاسىنىڭ جوسپارى الەمدىك قالا قۇرىلىسشىلارىنىڭ قىزىعۋشىلىعىن تۋدىرعانىن ايتىپ بەردى، دەپ حابارلايدى قازاقپارات.

«استانا قالاسىنىڭ ساۋلەتتىك جوسپارىنا جاريالانعان كونكۋرس الەمدىك قۇرىلىسشىلاردىڭ قىزىعۋشىلىعىن تۋدىردى. كەز كەلگەن ساۋلەتشى ءۇشىن اشىق دالادا جاڭا قالانى جوسپارلاۋ - شابىتىنا شابىت قوسىپ، ءوز قيالىن پاش ەتەتىن ۇلكەن مۇمكىندىك. كونكۋرسقا جاپونيا، ا ق ش، اۋستراليا، يتاليا، فرانسيا، كورەيا، بولگاريا جانە وزگە دە ەلدەردەن ەلۋدەن استام جوبا كەلىپ ءتۇستى. ولاردىڭ اراسىنان 27 جوبا ىرىكتەلىپ الىندى. ىرىكتەۋ ناتيجەسىندە قازىرگى زاماننىڭ تالانتتى ساۋلەتشىسى كيسيە كۋروكاۆانىڭ جوباسى ۇزدىك دەپ تانىلدى. تانىمال كونسەپتۋاليستىڭ يدەياسىنا سايكەس، قالانىڭ سول جاعالاۋىنا باسىمدىق بەرىلدى. ارينە، ول جوبا جاي عانا يدەيا بولدى. شىنايى ومىردە ءبىراز تۇزەتۋلەر ەنگىزۋگە تۋرا كەلدى. ءبىز دە ءومىر تالاپتارىنا مويىنسۇنىپ، ىسكە كىرىستىك»، - دەپ ەسكە الدى پرەزيدەنت.

مەملەكەت باسشىسى جاڭا استانانىڭ جان-جاققا ۇلعايىپ مەگاپوليسكە اينالعانىن قالاماعان.

«جاسىراتىنى جوق، جاڭا ەلوردا سالۋ - مەنىڭ باستامام. مەن ساۋلەتشىلەرگە قالانىڭ جان-جاققا سوزىلىپ جاتقان جانسىز مەگاپوليسكە اينالماۋى تۋرالى تالاپ قويدىم. كۋروكاۆا بۇل تالاپتى ەسكەرە وتىرىپ، «ءومىر ۇستانىمى» دەپ اتالاتىن بىرەگەي جوبا ۇسىندى. وسىلايشا، كونكۋرستا جەڭىپ شىقتى. مەن قالانىڭ جانسىز نىسان عانا ەمەس، اداممەن، تابيعاتپەن بايلانىستى ءتىرى اعزا رەتىندە قالىپتاسقانىن قالادىم»، - دەيدى ەلباسى.

سونداي-اق، پرەزيدەنت الەمنىڭ وزگە استانالارىنا ساپارى مەن استانانىڭ ارالاس ساۋلەتتىك ستيلى تۋرالى اڭگىمەلەپ بەردى.

«برازيلياعا بارعانىمىزدا، ماعان وسكار نيمەيەر جوبالاعان ەل استاناسى - برازيليانىڭ مودەرنيستىك ءستيلى ۇنادى. كەز كەلگەن قالا بىركەلكى سالىنسا، كورىنەدى. سايكەسىنشە، استانادا كلاسسيكالىق ساۋلەت پەن مودەرن ستيلىندەگى ساۋلەتتىك عيمرااتتار قاتار دامۋى ءتيىس. مۇمكىندىگىنشە، سولاي جاساپ جاتىرمىز. اقوردا، «استانا وپەرا» تەاترى، سىرتقى ىستەر مينيسترلىگىنىڭ عيماراتى، «استانا تريۋمف» كلاسسيكالىق ستيلدە سالىنسا، «استانا - تاۋەر»، «حان شاتىر»، «استانا- ارەنا»، «سولتۇستىك شۇعىلاسى» ت ك - ءۇشىنشى مىڭجىلدىق ساۋلەتىنىڭ ۇلگىلەرى»، - دەپ اتاپ ءوتتى نۇرسۇلتان نازاربايەۆ.

«ەڭ باستىسى - قالالىق ينفراقۇرىلىم وزىنشە قالىپتاسىپ كەلەدى. 2010 -جىلى استانادا ە ق ى ۇ سامميتىن وتكىزگەندە قالانىڭ دۇرىس باعىتتا دامىپ جاتقانىن بايقادىق. 55 ەلدىڭ دەلەگاتسياسىن قابىلداپ، مىڭداعان ادامعا قىزمەت كورسەتۋ، لوگيستيكا، قاۋىپسىزدىك ماسەلەلەرىن شەشۋ وڭايعا سوقپادى. بۇل كوپ عاسىرلىق تاريحى بار، ءداستۇرى قالىپتاسقان استانالار ءۇشىن دە اۋىر. ەلوردا بۇل سىناقتان سۇرىنبەي ءوتتى»، - دەدى پرەزيدەنت.

تولىق سۇحباتتى «كازاحستانسكايا پراۆدا» گازەتىنەن وقۋعا بولادى.