تومەن جالاقى الاتىن ادامداردىڭ ايلىعىن بىرنەشە ەسەگە كوتەرۋ قاجەت - سەناتور

استانا. قازاقپارات - تومەن جالاقى الاتىن ادامداردىڭ ايلىعىن بىرنەشە ەسەگە كوتەرۋ قاجەت. مۇنداي ۇسىنىستى بۇگىن ق ر پارلامەنتى سەناتىندا وتكەن جەرگىلىكتى وكىلدىك ورگاندارمەن ءوزارا ءىس-قيمىل جونىندەگى كەڭەس وتىرىسىندا سەناتور اسقار بەيسەنبايەۆ جاسادى، دەپ حابارلايدى قازاقپارات ءتىلشىسى.

«تومەن جالاقى الاتىن كوپتەگەن ازاماتتارعا مەملەكەت تاراپىنان تابىس سالىعىن 90 پايىزعا تومەندەتۋ ۇلكەن كومەك دەپ سانايمىن. بۇل دەر كەزىندە كوتەرىلگەن ماسەلە. دەگەنمەن، 120 مىڭعا جۋىق تومەن جالاقىمەن مەكتەپتە، اكىمدىكتەردە ەدەن جۋاتىن ادامدار بار. ولاردىڭ جالاقىسى 50 مىڭ تەڭگەنىڭ توڭىرەگىندە. سالىقتى تومەندەتۋ ولارعا - كومەك. ءبىراق، ولاردىڭ الداعى ۋاقىتتا جالاقىسى قالاي بولادى؟»، - دەدى سەناتور.

ونىڭ ايتۋىنشا، ەلىمىزدە ايلىق 10 پايىزعا كوتەرگەن كەزدە 50 مىڭ تەڭگە جالاقى 5 مىڭعا، 100 مىڭ 110 مىڭعا، ال 1 ميلليون جالاقى 1,1 ميلليونعا كوتەرىلەدى.

«تومەن جالاقى مەن ورتاشا جالاقى اراسىنداعى ايىرماشىلىق ول كوتەرىلگەن سايىن ۇلعايىپ كەلەدى. بۇعان جالاقى كوتەرىلگەن كەزدە مىندەتتى تۇردە بازارداعى بارلىق تاۋارلاردىڭ قىمباتتايتىندىندىعىن ەسكە الار بولساق، وندا ولاردىڭ كۇن كورىسى تومەندەپ بارا جاتىر. ولاردىڭ جاعدايىن قالاي تۇزەيمىز؟»، - دەپ سۇرادى اسقار بەيسەنبايەۆ وتىرىسقا قاتىسقان ەلىمىزدىڭ ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆادان.

ۆيتسە-ءمينيستردىڭ ايتۋىنشا، تومەن جالاقىنى كوتەرۋگە باعىتتالعان بىرنەشە شەشىم قارالىپ جاتىر.

«ءبىرىنشى - تومەنگى ايلىقتى كوبەيتۋ. ياعني، بۇگىنگى تاڭدا ول 28284 تەڭگە بولسا، وندا وسى كورسەتكىشتى قايتا قاراۋ نەمەسە كوتەرۋ. ەكىنشى - وسى سالادا جۇمىس ىستەپ وتىرعان ازاماتتاردىڭ ەڭبەكاقىسىن ارتتىرۋ ءۇشىن بازالىق لاۋازىمدىق جالاقىسىن قايتا قاراۋ. بارلىعى ەكونوميكا جاعدايىنا بايلانىستى. دەگەنمەن، بارلىق ەسەبى جۇرگىزىلىپ، بيۋدجەتتەن كەرەك قاراجات سانالعان»، - دەدى ول.

سۆەتلانا جاقىپوۆانىڭ مۇنداي جاۋابىنا سەناتوردىڭ كوڭىلى تولمادى.

«ءسىزدىڭ بۇل ايتقانىڭىز ماسەلەنى شەشپەيدى. سىزدەر ەڭ تومەنگى جالاقىنى كوتەرەمىز دەيسىزدەر. ەڭ تومەنگى جالاقى كوتەرسە بارلىعىنىڭ ايلىعى كوتەرىلەدى. ال تومەن الاتىن ادامداردىڭ جالاقىسى شەشىلمەيدى. بۇل رەتتە ءبىراق جول بار، ول - ەڭ تومەن جالاقى الاتىن ادامداردىڭ ايلىعىن بىرنەشە ەسە كوتەرۋ»، - دەدى اسقار بەيسەنبايەۆ.