نۇرسۇلتان نازاربايەۆ: مەن ءوز ساياسي بولاشاعىمدى قاتەرگە تىكتىم

None
None
استانا. قازاقپارات - نۇرسۇلتان نازاربايەۆ «كازاحستانسكايا پراۆدا» گازەتىنە بەرگەن سۇحباتىندا استانا قۇرىلىسىنىڭ العاشقى جىلدارىن ەسكە الدى، دەپ حابارلايدى قازاقپارات.

«مەنىڭ دوسىم I حۋان كارلوس II فيليپپ كورول بولعان شاقتا ەل استاناسىن تولەدودان مادريدكە كوشىرۋدىڭ ناعىز داۋعا اينالعانىن ايتىپ بەرگەن ەدى. دجوردج ۆاشينگتون دا ەلسىز دالادا جاڭا استانا سالعاندا اياۋسىز سىننىڭ استىندا قالدى. مەنىڭ دە تاراپىما ءبىراز سىن ايتىلدى. ءتىپتى ءبىر گازەت «پرەزيدەنت نازاربايەۆتىڭ جەكە استاناسى» دەگەن تاقىرىپپەن ماقالا شىعاردى. وندا «ەڭبەكاقى مەن زەينەتاقىعا جۇمسالاتىن اۋقىمدى قاراجاتتى جىمقىرۋدى ەشقانداي ستراتەگيالىق جوسپار اقتاي المايدى» دەپ جازعان. حالىق اراسىندا اقمولادا جاز بويى اڭىزاق جەل سوعادى، قىستا قالانى قار باسادى، قالانىڭ ءوزى باتپاق ۇستىنە تۇر، دەنى دۇرىس اۋىز سۋ دا جوق دەگەن اڭگىمەلەر ءورىپ ءجۇردى»، - دەپ ەسكە الدى پرەزيدەنت.

ول تۋعان ولكەدە جامان جەردىڭ جانە جامان اۋا رايىنىڭ بولمايتىنىن اتاپ ءوتتى.

«ارينە، مۇنداعى كليماتتى كەرەمەت دەپ ايتۋعا كەلمەيدى. دالا بورانى سوعادى. ءبىر كۇنى بورانعا بايلانىستى، اۋەجاي تۇتاس تاۋلىككە جابىلعان. وندا تىكۇشاق تا قوندىرا الماي، استاناعا كوكشەتاۋدان پويىز ارقىلى جەتكەنىم بار. تۋعان ولكەڭنىڭ جامان جەرى بولا ما ەكەن؟ مۇنىڭ بارلىعى - ءبىزدىڭ وتانىمىز، وتانىمىزدىڭ كليماتى، وتانىمىزدىڭ تابيعاتى. «تۋعان جەردىڭ ءتۇتىنى دە قىمبات» دەگەن ءسوز بار. سارى ارقانىڭ تابيعاتى وزىنشە سۇلۋ. ءبىر جاعىندا - قورعالجىن، ەكىنشى جاعىندا - بۋراباي. ءۇشىنشى جاقتا - ەرەيمەنتاۋ، ءارى قاراي - قارقارالى، باياناۋىل بار»، - دەدى نۇرسۇلتان نازاربايەۆ.

«وكىنىشكە قاراي، قالانى حالىقارالىق تانىستىرىلىمعا دايىندىق بارىسىن «وبا كەزىندەگى تويعا» تەڭەگەن جۋرناليستەر بولدى. گازەتتەر مەن تەلەارنالار اقمولانىڭ ماسالارى تۋرالى «ارمانسىز» جازدى، سيۋجەت كورسەتتى. ونداي ماتەريالداردىڭ ەشقايسىسىنا ءمان بەرمەدىم. ءمان بەرۋگە ۋاقىت تا بولمادى. فيلوسوفتار ايتقان ءسوز بار: «ەگەر الدىڭا ماقسات قويساڭ، وعان جەتەر جولدا ءار ۇرگەن يتكە تاياق لاقتىرساڭ، ماقساتىڭا مۇلدەم جەتپەيسىڭ». ەشتەڭەگە قاراماستان، الدىمدا قويعان ماقساتقا تۋرا جۇرە بەردىم»، - دەدى ول.

سونىمەن بىرگە، پرەزيدەنت قالانى ماسادان تازارتۋ، توپىراقتى كەپتىرۋ، اباتتاندىرۋ جۇمىستارىن قالاي جۇرگىزگەنىن ايتىپ بەردى.

«ماسالاردان ارىلۋدىڭ ەڭ ۇزدىك جولى قالاداعى توپىراقتى كەپتىرۋ بولدى. بۇل ماسەلەنى وتە جىلدام شەشتىك. ەسىلدىڭ بويىنداعى قامىس-قوپالارى شابىلدى، قالا ىشىندەگى بوس كەڭىستىكتەرگە گۇلدەر ەگىلدى، اسفالت توسەلدى. وسىلايشا، قىسىر وسەك-اياڭدار سيرەي باستادى(...) ەل استاناسىن اۋىستىرۋ ارقىلى ءوزىمنىڭ ساياساتتاعى كەلەشەگىمدى قاتەرگە تىگىپ وتىرعانىمدى ءتۇسىندىم. ءبىراق، ىسكە كىرىسىپ كەتتىك. اقمولاعا اي سايىن باراتىنمىن، اۋەجايدان تىكە قۇرىلىس نىساندارىنا بەت الاتىنمىن»، - دەپ ەسكە الدى نۇرسۇلتان نازاربايەۆ.

سۇحباتتىڭ تولىق ءماتىنىن «كازاحستانسكايا پراۆدا» گازەتىنەن وقۋعا بولادى.

سوڭعى جاڭالىقتار