فۋتبولدان ءا چ: پورتۋگاليالىق رونالدۋ مەرگەندەر كوشىن باستاي الا ما؟

ورال. قازاقپارات - بۇگىن رەسەيدە ءوتىپ جاتقان فۋتبولدان الەم چەمپيوناتىنىڭ كەزەكتى كۇنى پورتۋگاليا- ماروككو ويىنىمەن باستالادى، دەپ حابارلايدى قازاقپارات ءتىلشىسى.

ماسكەۋدىڭ «لۋجنيكي» ستاديونىندا وتەتىن كەزدەسۋدە ەۋروپا چەمپيونى - پورتۋگاليا قۇراماسىنىڭ ءباسى بيىك تۇرعانى انىق.

ءبىرىنشى تۋردا يسپانيامەن وتكەن اسا تارتىستى ماتچتا كريشتيانۋ رونالدۋ چەمپيوناتتاعى تۇڭعىش حەت-تريكتىڭ اۆتورى اتانىپ، كوماندالار 3:3 ەسەبىمەن تارقاسقان ەدى. بۇل پورتۋگاليالىقتار ءۇشىن جاقسى ناتيجە دەۋگە بولادى.

قازىرگى تاڭدا فۋتبولقۇمار اعايىندار رونالدۋ مەن ارگەنتينالىق ليونەل مەسسيدى سالىستىرىپ اۋرە. يسلانديامەن تەكەتىرەستە 11 مەترلىك پەنالتيدى سوعا الماي، مەسسيدىڭ مەسەلى قايتسا، رونالدۋ بىرىنشىلىكتى كەرەمەت باستادى. دەگەنمەن وتكەن تۇندە رەسەيلىك دەنيس چەرىشەۆ تاعى ءبىر گول سوعىپ، رونالدۋدى قۋىپ جەتتى. الداعى ويىنداردا مەسسي جانە باسقا سۇرمەرگەندەردىڭ دە قاراپ قالماسى بەلگىلى.

بۇگىنگى ويىندا پورتۋگاليالىقتارعا قالايدا جەڭىس قاجەت. بۇل جولى دا شابۋىل رونالدۋ ارقىلى ءوربيتىنى انىق. ونىڭ قانجىعاسى تاعى مايلانسا، مەرگەندەر كوشىندە جەكەدارا العا شىعادى.

پورتۋگاليانىڭ باس باپكەرى فەرناندۋ سانتۋش كريشتيانۋ باستاعان سايىپقىراندارىنا سەنەتىنىن، دەگەنمەن افريكاداعى ۇزدىكتەردىڭ ءبىرى ماروككونىڭ قۇرامىندا ەۋروپا چەمپيوناتتارىندا ونەر كورسەتەتىن تاجىريبەلى فۋتبولشىلاردىڭ بار ەكەندىگىن مويىنداپ وتىر.

ءبىرىنشى تۋردا ويدا جوق جەردەن يرانعا 0:1 ەسەبىمەن ەسە جىبەرگەن ماروككونىڭ شەگىنەر جەرى جوق. ولار كەشە پولشانى 2:1 ەسەبىمەن تىزە بۇكتىرگەن سەنەگالدىڭ ەرلىگىن قايتالاي الا ما، ونى ويىن كورسەتەدى.

بۇعان دەيىن پورتۋگاليا مەن ماروككو كوماندالارى الەم چەمپيوناتىندا ءبىر-اق مارتە كەزدەسكەن. 1986 -جىلى مەكسيكادا ماروككو 3:1 ەسەبىمەن جەڭىسكە جەتىپ، پورتۋگاليالىقتار ءوز توبىنان شىعا الماي، جەرگە قاراعان ەدى.

امەريكالىق مارك گەيگەر قازىلىق ەتەتىن الداعى ماتچتا كوماندالار شامامەن مىناداي قۇرامدا شىقپاقشى: پورتۋگاليا: پاتريسيۋ - سوارەش، پەپە، فونتە، گەررەيرو - ب. سيلۆا، موۋتينيۋ، كارۆاليۋ، فەرناندەش - گەدەش، رونالدۋ.

ماروككو: مۋنير - بەناتيا، سايسس، حاكيمي - س. امرابات، ال- احمادي، زيەح، بۋسسۋفا - اريت، بەلاندا، ەل- كاابي.

ايتا كەتەيىك، ۆ توبىندا بۇگىن سونداي-اق قازان قالاسىندا يران- يسپانيا كوماندالارى كۇش سىناسادى.