ءبىز استانانى تۇرعىزاردا بيۋدجەتكە سالماق تۇسىرمەۋگە تىرىستىق - ق ر پرەزيدەنتى

None
None
استانا. قازاقپارات - ەلوردانىڭ ىرگەسى العاشقى جىلدارى قالاي قالانعانى تۋرالى قازاقستان پرەزيدەنتى نۇرسۇلتان نازاربايەۆ «كازاحستانسكايا پراۆدا» گازەتىنە بەرگەن سۇحباتىندا ايتىپ بەردى، دەپ حابارلايدى قازاقپارات ءتىلشىسى.

«جاڭا استانانىڭ ىرگەسىن قالاۋدا قارجىلاندىرۋ كوزىن تابۋ - ەڭ كۇردەلى شارۋالاردىڭ ءبىرى بولدى. اقشا بولسا - ءىس تە العا جۇرەدى. بۇكىل ابىرويدى سالۋعا تۋرا كەلدى. اقمولا ەركىن ەكونوميكالىق اۋماعىن قۇرۋ ارقىلى بەلگىلى ءبىر سومانى جيناپ الدىق. كەڭەس وداعىنان قالعان ماتەريالدىق رەزەرۆتەردى دە ىسكە قوستىق. بۇل قور البەتتە از ەمەس ەدى - ولار مەتالل مەن تەمىر قۇيماسىنان، قۇرىلىس ماتەريالدارىنان تۇراتىن. ونىڭ ىشىنەن قازاقستانعا قاجەتتى بولىگىن عانا قالدىرىپ، قالعانىن ساتىپ جىبەرىپ، ودان تۇسكەن 20 ميلليون دوللاردى ەلوردا قورىنا اۋداردىق. جالپى، ءبىز استانانى تۇرعىزاردا بيۋدجەتكە سالماق تۇسىرمەۋگە تىرىستىق. ءاربىر تەڭگە ەسەپكە الىنىپ، ارتىق شىعىننىڭ بولماۋىن قاداعالادىق»، - دەيدى نۇرسۇلتان نازاربايەۆ.

پرەزيدەنت ءوز سوزىندە قۇرىلىستى قارجىلاندىرۋدىڭ باستى كوزى - ينۆەستيسيالار بولعانىن ايتادى.

«ءبىز شەتەلدىك ينۆەستورلاردان 10 جىل مەرزىمگە پايىزسىز نەسيە الۋعا قول جەتكىزدىك. سونىمەن قاتار، كوپتەگەن نىساندار گرانتتار مەن وتەماقىسىز ينۆەستيسيالارعا سالىنعان»، - دەيدى قازاقستان پرەزيدەنتى.

وسىلايشا، اقوردا قۇنى 22 ميلليون دوللارلىق ءابۋ-دابي دامۋ قورىنىڭ گرانتى ەسەبىنەن بوي كوتەرگەن. «نۇر استانا» مەشىتى - كاتار مەملەكەتىنىڭ 15 ميلليون دوللارلىق گرانت ەسەبىنىنەن تۇرعىزىلسا، قۇنى 33 ميلليون دوللارلىق «استانا- تاۋەر» ورتالىعىن تۇركيا قارجىلاندىرعان. قازىرگى اۋىل شارۋاشىلىعى مينيسترلىگىنىڭ عيماراتى كۋۆەيت گرانتىنىڭ ەسەبىنەن سالىنسا، ال سالتانات سارايىن ومان ءامىرى سىيعا تارتقان.

«الاتاۋ» سپورت كەشەنى مۇناي سالاسىنداعى ينۆەستورلاردىڭ تارتۋى. مۇنداي عيماراتتار البەتتە از ەمەس. بىرىككەن اراب امىرلىكتەرىنەن، ساۋد ارابياسىنان، يتاليا، جاپونيا مەن وزگە دە ەلدەردەن گرانتتاردىڭ اعىنى كەلىپ جاتتى. عيماراتتاردىڭ كوبىن شەتەلدىكتەر قازاقستان حالقىنا، پرەزيدەنتكە سىي رەتىندە تابىس ەتكەن.

«ءبىزدىڭ ازاماتتار دا ايتارلىقتاي ۇلگى كورسەتتى. وسى جەرگە كەلگەننەن كەيىن مەن اقمولالىق كاسىپكەرلەردى جيناپ الىپ، ولاردان قالاعا سىيلىق جاساۋدى سۇرادىم. اسقار مامينگە وسىعان دەيىن ساتىلىپ الىنعان «ماسكەۋ» قوناق ءۇيىن مەملەكەتكە قايتارۋ تۋرالى ۇسىنىس جاسادىم. كەيىن ءبىز وسى عيماراتقا سىرتقى ىستەر مينيسترلىگىن كىرگىزدىك. ونداعان يەگەرلەر وزدەرىنىڭ كوتتەدجدەرىن تاپسىرىپ، ول جەرلەرگە ينتەلليگەنسيا وكىلدەرى مەن شەنەۋنىكتەردى ورنالاستىردىق. باسقا امال جوق تا ەدى. قالادا ءزاۋلىم دەگەن عيماراتتاردىڭ سانى ساناۋلى بولاتىن. ويىن-ساۋىق باعىىنداعى نىساندار مۇلدە جوق بولاتىن»، - دەيدى نۇرسۇلتان نازاربايەۆ.

سوڭعى جاڭالىقتار