قاسىم-جومارت توقايەۆ قازاقستاندىق ساراپشىلار الدىنا جاڭا مىندەتتەر قويدى

استانا. قازاقپارات - استانادا قازاقستاننىڭ حالىقارالىق قاتىناستار جونىندەگى كەڭەسىنىڭ (ق ح ق ك) جىل سايىنعى جينالىسى ءوتتى، دەپ حابارلايدى قازاقپارات ق ر پارلامەنتى سەناتىنىڭ باسپا ءسوز قىزمەتىنە سىلتەمە جاساپ.

فورۋمدا ءسوز العان سەنات ءتوراعاسى، ق ح ق ك قۇرمەتتى ءتوراعاسى قاسىم-جومارت توقايەۆ الەم دامۋىنداعى ۇردىستەردى جان- جاقتى ءارى تەرەڭ تالداۋ تۇرعىسىندا كەڭەس ەلىمىزدىڭ سىرتقى ساياساتىنداعى ماڭىزدى ماسەلەلەردى شەشۋدە يننوۆاتسيالىق تاسىلدەر ازىرلەنەتىن ءتيىمدى پىكىرتالاس ورتالىعى بولۋى تيىستىگىن اتاپ ءوتتى.

ق. توقايەۆ نەگىزگى ەكى اعىمنىڭ - جاھاندانۋ مەن ۇلتشىلدىقتىڭ ءتۇيىسۋى سالدارىنان تۋىنداعان الەمدەگى جاعدايلاردىڭ شيەلەنىستى سيپاتتارىن اتاپ ءوتتى. ءتوراعا سونداي-اق قازىرگى زامانداعى حالىقارالىق قاتىناستاردا ءبىرىنشى كەزەكتە نارىق جولىنداعى كۇرەس كورىنىس تاۋىپ وتىرعانىنا توقتالدى. وسىعان بايلانىستى ىقپالداسۋ بىرلەستىكتەرىندەگى پروتسەستەر سالماقتى تالداۋدى قاجەت ەتەدى.

قازاقستان ەكونوميكاسىنىڭ مۇددەسىنە وراي الەۋەتىن كۇشەيتۋ تۇرعىسىندا ەۋرازيالىق ەكونوميكالىق وداققا ەرەكشە نازار اۋدارىلۋى ءتيىس. ءتوراعا ساراپشىلاردى جاھاندىق ساياساتتا سالماقتى ورىن الا باستاعان ش ى ۇ ماسەلەلەرىمەن شۇعىلدانۋعا شاقىردى. قازاقستاننىڭ ورتالىق ازياداعى نەگىزگى مەملەكەتتەرمەن ىنتىماقتاستىعى ىرگەلى تالداۋ جۇمىستارى بويىنشا دامۋى ءتيىس.

ق. توقايەۆتىڭ پىكىرىنشە، كەڭەس اياسىندا جۇزەگە اساتىن تالداۋ جۇمىستارىنا ينستيتۋتتاردىڭ، ورتالىقتاردىڭ، جالپى العاندا ۇكىمەتتىك ەمەس ۇيىمداردان تۇراتىن بۇكىل ازاماتتىق قوعام وكىلدەرىن كەڭىنەن تارتۋ كەرەك.

ونىڭ پايىمىنشا، استانا حالىقارالىق قارجى ورتالىعىنىڭ تۇساۋكەسەرى؛ كاسپيي ماڭى مەملەكەتتەرىنىڭ سامميتى؛ الەمدىك جانە ءداستۇرلى دىندەر ليدەرلەرىنىڭ VI سەزى سەكىلدى الدا بولاتىن گەوساياساتتاعى ماڭىزدى وقيعالار تۇرعىسىندا ساراپشىلاردىڭ كۇش-جىگەرى قاجەت بولادى. بۇل وقيعالار ساراپشىلاردان ورتا جانە ۇزاق مەرزىمدەگى كەلەشەككە كاسىبي بولجام جاساۋدى جانە پايدالى ۇسىنىستار ازىرلەۋدى تالاپ ەتەدى.

قازاقستاننىڭ حالىقارالىق قاتىناستار جونىندەگى كەڭەستىڭ ءتوراعاسى ەرلان قارين كەڭەستىڭ 2017 -جىلعى جۇمىسى جانە 2018-2019 -جىلدارعا ارنالعان ءىس-قيمىلدىڭ باسىم باعىتتارى جونىندە باياندادى.

شاراعا ەلىمىزدىڭ سىرتقى ىستەر ءمينيسترى قايرات ءابدىراحمانوۆ، پرەزيدەنتتىڭ كومەكشىسى نۇرلان ونجانوۆ، وتاندىق جەتەكشى تالداۋ ورتالىقتارىنىڭ باسشىلارى، ساراپشىلار قاۋىمداستىعىنىڭ وكىلدەرى قاتىستى.