اقتوبەدەن تۇيە مەن قوي ءجۇنى موڭعولياعا ەكسپورتتالادى

اقتوبە. قازاقپارات - اقتوبەلىك كاسىپكەر قوي مەن تۇيە ءجۇنىن قابىلداپ جاتىر.

جوسپار بويىنشا ول جىلىنا 200 توننا تۇيە، 500 توننا قوي ءجۇنىن موڭعولياعا ەكسپورتتايدى، دەپ حابارلايدى قازاقپارات ءتىلشىسى.

اقتوبە شارۋالارى ءۇشىن تاعى ءبىر ماسەلەنىڭ ءتۇيىنى شەشىلەدى. قوي قىرقىپ، ءجۇنىن قايدا جىبەرەرىن بىلمەيتىن شارۋالار ەندى ءار كەلىسىن 50-60، ال تۇيە ءجۇنىنىڭ كەلىسىن 700-750 تەڭگەگە ساتا الادى.

اقتوبە وبلىسى اكىمىنىڭ ورىنباسارى ماۆر ابدۋلليننىڭ ايتۋىنشا، جەرگىلىكتى كاسىپكەر ءجۇندى ەكسپورتتاۋعا شەشىم قابىلداپ، موڭعوليامەن بايلانىس ورناتتى.

«قازىرگى كۇنى ءجۇندى جيناۋ باستالدى. الداعى ۋاقىتتا ءجۇندى ەكسپورتقا شىعارامىن. ۆەتەريناريالىق ينسپەكسيادان ارنايى رۇقسات الىپ، كەلەر اپتادا جۇمىستىڭ جاڭا ساتىسىنا شىعامىز. ءجۇندى موڭعولياداعى ءجۇن وڭدەۋ فابريكاسىنا جىبەرەمىن. كەلىسىمشارت جاسالىپ، جىلىنا 200 توننا تۇيە، 500 توننا قوي ءجۇنى تاسىمالدانۋعا مۇمكىندىك الدىق»، - دەدى كاسىپكەر قايرات قۇتتىمۇراتوۆ.

ايتا كەتەيىك، ءجۇندى تەمىرجول ارقىلى تاسۋ مۇمكىن بولمادى. سەبەبى، فابريكا تەمىرجول بويىندا ورنالاسپاعان. ەكى ەل اراسىنداعى قاشىقتىق 3 مىڭ شاقىرىمدى قۇراپ وتىر.

«كولىك ارقىلى تاسىمالدانعان سوڭ فابريكا جول شىعىنىنىڭ جارتىسىن وتەيتىن بولدى. ءجۇن جۋىلمايدى، تەك نىعىزدالادى. بۇل باستاماسى عانا. الدا ءجۇن كولەمىن كوبەيتۋ ءۇشىن ماڭعىستاۋ، اتىراۋ، قىزىلوردا وبلىستارىنان قابىلداۋ بەكەتىن اشقىم كەلەدى»، - دەدى كاسىپكەر.