پرەزيدەنت جاڭا وبلىس ورتالىعىنىڭ قۇرىلۋىنا بايلانىستى ءبىرقاتار تاپسىرمالار جۇكتەدى
ايتا كەتەيىك، اتالعان تاريحي وقيعاعا بايلانىستى جازىلعان بەينە ءتۇسىرىلىمدى AkordaPress الەۋمەتتىك جەلىدەگى پاراقشاسىندا جاريالادى.
«قۇرىلىپ جاتقان اۋماقتاردى دامىتۋ ءۇشىن تەز ارادا ناقتى ءىس-شارالاردىڭ جول كارتاسىن ازىرلەۋ قاجەت. جاڭا اكىمشىلىك-اۋماقتىق بىرلىك پايدا بولعانىنا دەيىن جاقىن ارادا ءتيىستى زاڭنامالىق اكتىلەرگە تۇزەتۋلەر مەن وزگەرىستەر ەنگىزۋ كەرەك. تۇركىستاندا جاڭا اكىمشىلىك عيماراتتارىن جانە وندا تۇرعىن ۇيلەر سالۋدى تەز ارادا قولعا الۋ قاجەت»، - دەپ جۇكتەدى پرەزيدەنت.
وتپەلى كەزەڭدە بارلىق ورتالىق، جەرگىلىكتى مەملەكەتتىك ورگانداردىڭ وڭىرلىك بولىمشەلەرىنىڭ ۇزدىكسىز جۇمىسىن شىمكەنتتە قامتاماسىز ەتۋ قاجەت ەكەنى اتالىپ ءوتتى.
«بۇگىندە وبلىس اكىمدىگى شىمكەنتتە ورنالاسقان. ولار كوشكەنگە دەيىن شىمكەنتتە جۇمىستارىن جالعاستىرادى، ياعني تۇركىستان قالاسىندا ينفراقۇرىلىم مەن ءتيىستى عيماراتتاردى سالعانعا دەيىن جۇمىس ىستەيدى»، - دەدى مەملەكەت باسشىسى.
سونىمەن قاتار ن. نازاربايەۆ مەمورگاندارعا وڭىردە تۋريستىك سالانى ارى قاراي دامىتۋ بويىنشا شارالاردى قابىلداۋدى تاپسىردى.
«وبلىس اكىمى ۇكىمەتپەن بىرلەسە بارلىق ماسەلەلەرگە جان-جاقتى تالداۋ جاساپ، قىسقا مەرزىمدە ناقتى ۇسىنىستاردى ەنگىزۋى ءتيىس»، - دەدى پرەزيدەنت.
بۇدان بۇرىن حابارلانعانداي، ق ر پرەزيدەنتى نۇرسۇلتان نازاربايەۆ «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسىنىڭ كەيبىر ماسەلەلەرى تۋرالى» جارلىققا قول قويدى.
بۇگىن ەلباسى نۇرسۇلتان نازاربايەۆ تۇركىستان وبلىسىنىڭ پايدا بولۋىنا بايلانىستى پىكىر ءبىلدىردى.
سونىمەن قاتار مەملەكەت باسشىسى تۇركىستان وبلىس ورتالىعى بولۋعا ابدەن لايىق ەكەنىن قاداپ ايتتى.