الماتىدا سىرتقى تۋريزمدى دامىتۋ ءۇشىن بارلىق جاعداي جاسالادى

الماتى. قازاقپارات - الماتىدا وتكەن قوعامدىق كەڭەس وتىرىسىندا سىرتقى تۋريزم سالاسىن دامىتۋ ماسەلەسى تالقىلاندى، دەپ حابارلايدى قازاقپارات ءتىلشىسى.

قالالىق تۋريزم جانە سىرتقى بايلانىستار باسقارماسىنىڭ باسشىسى ەرلان جايلاۋبايدىڭ ايتۋىنشا، شەتەلدىكتەردىڭ الماتىعا جەتۋى تىم ۇزاق ۋاقىتتى الادى.

وسى ولقىلىقتىڭ ورنىن تولتىرۋ ءۇشىن بۇگىندە اۋە جەلىلەرى قاتارى كوبەيىپ كەلە جاتىر. مىسالى رەسەي اۋە كومپانياسى الماتى-كراسنويارسك-يركۋتسك باعىتىندا اۋە رەيسىن اشتى. سىبىردەن كەلەتىن تۋريستەرگە باسقا ەش جەرگە قوناقتاۋدىڭ قاجەتى جوق. لاتۆيالىق تاسىمالداۋشى دا ريگادان الماتىعا تىكەلەي رەيس اشتى.

«ازاماتتىق اۆياتسيا كوميتەتى باسشىلىعىمەن وسى باعىتتا ءوزارا تۇسىنىستىك ورنادى. فينلياندياداعى حەلسينكي قالاسىنا بارىپ، FinAir كومپانياسىمەن كەلىسسوزدەر جۇرگىزدىك. سولتۇستىك ەۋروپا مەن ورتالىق ازيانىڭ اراسىن بىرىكتىرۋ ءۇشىن. الايدا، كەلىسسوزدەن سوڭ ولار استاناعا رەيس اشۋ تۋرالى شەشىمدە قالدى. ءبىز ءوز تاراپىمىزدان الماتىنىڭ ەكونوميكالىق تۇرعىدان دا، تۋريستىك تۇرعىدان دا الەۋەتىنىڭ مول ەكەنىن بارىنشا جەتكىزۋگە تىرىستىق. الايدا، اۋە كومپانياسى الماتىعا رەيس اشاتىن بولسا، ولار مۇندا بولەك ەكيپاج ۇستاۋعا ءتيىس بولادى. بۇل كوپ شىعىندى تالاپ ەتەدى»، - دەدى باسقارما باسشىسى ەرلان جايلاۋباي.

ۆيزالىق رەجىمگە كەلسەك، ق ر س ءى م جىل سوڭىنا دەيىن 23 ۆيزالىق ەلگە ەلەكتروندى ۆيزا ەنگىزۋدى جوسپارلاپ وتىر.

بۇل شەتەلدىك تۋريستەردىڭ الماتىعا، قازاقستانعا كەلۋىنە جول اشادى.

«تۋريزم سالاسىنداعى جەتىستىكتەرىمىزگە كوڭىلىمىز تولادى، ارينە. ءبىراق، بۇل ءبىز قوزعالاتىن قارقىن ەمەس. اتقاراتىن جۇمىس ءالى جەتەرلىك»، - دەدى باسقارما باسشىسى.

قوعامدىق كەڭەس مۇشەلەرى الماتىداعى تۋريستىك نىسانداردى ارالاپ شىققاندارىن، الايدا تۋريستىك ورىنداردان ءبىر دە ءبىر شەتەلدىك تۋريستى كەزدەستىرمەگەندەرىن ايتتى.

باسقارما باسشىسى ەرلان جايلاۋباي جىل سايىن الماتىعا كەلەتىن شەتەلدىك تۋريستەردىڭ سانى %14 عا ارتىپ وتىرعانىن جەتكىزدى.

«مەملەكەتتىك قىزمەت ۇسىنعان وتكەن جىلدىڭ قورىتىندىسىنا سايكەس بىلتىر الماتىعا 500 مىڭنان اسا ادام كەلگەن. ال، ورنالاسۋ ورىندارىنان كەلگەن اقپاراتقا سايكەس 350 مىڭ ادام قوناق ءۇي قىزمەتىن پايدالانعانىن بىلەمىز»، - دەدى ە. جايلاۋباي.

بۇگىندە الماتىلىق تۋريزم سالاسىنىڭ وكىلدەرى ازيا مەن ەۋروپاداعى تۋريستىك كورمەلەرگە قاتىسىپ ءجۇر. بىلتىر الماتى تۋرالى اقپارات «BBC» مەن «Euronews»  ارنالارىندا جاريالانعان.

Visit Almaty ورتالىعى قازاقستاننىڭ ءار وڭىرىنەن تۋريست تارتۋدا بەلسەندى ەڭبەك ەتىپ جاتىر.

وتىرىستا Visit Almaty ورتالىعىن تولىقتىرۋ تۋرالى ءبىرقاتار ماسەلە تالقىلاندى.

Visit Almaty ديرەكتورى كاميلا لۋكپانوۆا سايتتى قايتا جاساۋ ءۇشىن ماماندار جالدانعانىن ايتتى.