ەرلان سايروۆ: تۇركى ەلدەرى ىشىندە تۇركىستاننىڭ رۋحاني ءرولى ودان سايىن ارتاتىن بولادى

استانا. قازاقپارات - وڭتۇستىك قازاقستان وبلىسىنىڭ ورتالىعىن تۇركىستانعا كوشىرۋ - ۋاقتىلى ءارى وزەكتى شەشىم. الەۋمەت تانۋشى ءارى ساياساتتانۋشى، ق ر كاسىپوداقتار فەدەراتسياسى ءتوراعاسىنىڭ ورىنباسارى ەرلان سايروۆ قازاقپارات تىلشىسىنە وسىلاي پىكىر ءبىلدىردى، دەپ حابارلايدى قازاقپارات ءتىلشىسى.

«بۇگىنگى تاڭدا بۇرىنعى وڭتۇستىك قازاقستان وبلىسىندا 3 ميلليوننان استام حالىق تۇرادى. وزدەرىڭىز بىلەتىندەي، وڭتۇستىك قازاقستان - ەلىمىزدە حالىقتىڭ سانى جاعىنان ەڭ جوعارعى وبلىس بولاتىن. سوندىقتان، وبلىس ورتالىعىن تۇركىستانعا كوشىرىپ، ونىڭ اتىن وزگەرتۋ وتە وزەكتى ءارى ۋاقتىلى شەشىم دەپ ايتار ەدىم. ويتكەنى، قازاقستاندا قازىر حالقى 1 ميلليوننان استام قالالار از. سونىڭ ءبىرى - شىمكەنت. بۇل (وبلىس ورتالىعىن كوشىرۋ تۋرالى شەشىم - اۆت.) ءبىزدىڭ قازاقستاننىڭ الەۋمەتتىك-ەكونوميكالىق دامۋىنا وتە ۇلكەن كومەك بولارى ايقىن»، - دەيدى ەرلان سايروۆ.

الەۋمەت تانۋشىنىڭ ايتۋىنشا، ەلدىڭ الەۋمەتتىك-ەكونوميكالىق دامۋىن ارى قاراي جالعاستىرۋ ءۇشىن ايماقتار مەن دامۋ ورتالىقتارى كەرەك.

«شىمكەنت - بۇگىنگى تاڭدا ورتالىق ازيا ەلدەرىمەن ساۋدا قارىم-قاتىناسىنىڭ ۇلكەن ءبىر فورپوستى. شىمكەنت قارجىلىق ورتالىق بولا وتىرىپ، ۇلكەن مەگاپوليس رەتىندە قازاقستاننىڭ دامۋىنا ۇلكەن ۇلەسىن قوسا الادى. ال ەندى تۇركىستاندى وبلىس ورتالىعى ەتۋدىڭ وزىندىك ماڭىزى بار. تۇركىستان بۇكىل تۇركى حالىقتارى ءۇشىن رۋحاني ءرولى ەرەكشە ەكەندىگى بەلگىلى. سوندىقتان، اتالعان شەشىممەن بىرگە تۇركىستان ءۇشىن قازاقستان تاريحىندا دامۋدىڭ جاڭا پاراعى اشىلارى داۋسىز. ويتكەنى، ول - بىرىنشىدەن قارجى ينۆەستيتسياسى. ەكىنشىدەن، ادام ينۆەستيتسياسى. ۇشىنشىدەن ارينە، بۇل قالانىڭ قازاقستانعا عانا ەمەس، تۇركى ەلدەرى ىشىندەگى رۋحاني ءرولى ودان سايىن ارتا بەرەتىن بولادى. سوندىقتان قوعام بۇل شەشىمدى مىندەتتى تۇردە قولدايدى»، - دەدى ەرلان سايروۆ.

ەسكە سالا كەتسەك، بۇگىن ەلباسى نۇرسۇلتان نازاربايەۆ شىمكەنت قالاسىنا رەسپۋبليكالىق ماڭىزى بار قالا مارتەبەسىن بەرۋ جانە وبلىس ورتالىعىن تۇركىستان قالاسىنا كوشىرۋ تۋرالى جارلىققا قول قويعان بولاتىن.

«بۇگىن «قازاقستان رەسپۋبليكاسىنىڭ اكىمشىلىك-اۋماقتىق قۇرىلىس تۋرالى» زاڭىنىڭ توعىزىنشى بابىنا سايكەس، شىمكەنت قالاسىنا رەسپۋبليكالىق ماڭىزى بار قالا مارتەبەسىن بەرۋ جانە وبلىس ورتالىعىن تۇركىستان قالاسىنا كوشىرۋ تۋرالى جارلىققا قول قويعالى وتىرمىن. بۇدان بىلاي بۇل ءوڭىر تۇركىستان وبلىسى دەپ اتالاتىن بولادى. وسى اكىمشىلىك اۋماقتىڭ قۇرىلىمىنا وزگەرىس ەنگىزۋ ارقىلى بۇل ءوڭىردىڭ وركەندەۋىنە تىڭ سەرپىن بەرۋدى كوزدەگەن تاريحي قۇجات بولىپ سانالادى»، - دەپ اتاپ ءوتتى مەملەكەت باسشىسى.

اۆتور: ايان بەكەن ۇلى