تۇركىستان وبلىس ورتالىعى بولۋعا ابدەن لايىق - ەلباسى

استانا. قازاقپارات - تۇركىستان سىرتقى جانە ىشكى تۋريستەر مەن جەرگىلىكتى تۇرعىندار ءۇشىن وتە قولايلى. بۇگىن ەلباسى نۇرسۇلتان نازاربايەۆ وبلىس ورتالىعىن تۇركىستان قالاسىنا كوشىرۋ تۋرالى جارلىققا قول قويۋ كەزىندە وسىلاي ءمالىم ەتتى، دەپ حابارلايدى قازاقپارات.

ايتا كەتەيىك، اتالعان تاريحي وقيعاعا بايلانىستى جازىلعان بەينەتۇسىرىلىمدى AkordaPress الەۋمەتتىك جەلىدەگى پاراقشاسىندا جاريالادى.

تۇركىستان قازاق حاندىعىنىڭ ورداسى بولعان ءارى رۋحاني تاعىلىمى مول تاريحي مەكەن ەكەنىنە توقتالعان مەملەكەت باسشىسى، «جيىرماسىنشى عاسىردىڭ باسىندا قازاقتىڭ ءبىرتۋار ازاماتتارىنىڭ ەل مۇددەسى ءۇشىن جۇرگىزگەن ساياسي كۇرەسى دە تۇركىستان اتاۋىمەن تىعىز بايلانىستى بولعانىن بىلەمىز. شەجىرەلى ولكە مۇسىلماندار ءۇشىن دە قاسيەتتى بولىپ سانالادى»، - دەدى.

سونىمەن قاتار، پرەزيدەنت بۇل قالا ۇلى جىبەك جولىنىڭ بويىندا ورنالاسقان ۇلكەن وركەنيەت ورتالىعى ەكەنىن قاداپ ايتتى.

«تەك قازاق ەلىنىڭ عانا ەمەس، بۇكىل تۇركى جۇرتىنىڭ زيارات جاسايتىن قاستەرلى ورنى. ونىڭ رۋحاني ومىرىندە قوجا احمەت ياساۋي كەسەنەسىنىڭ ۇلكەن ورنى بار ەكەنىن بىلەمىز. تاريحى تەرەڭ تۇركىستاننىڭ تۋريزم ءۇشىن دە ماڭىزدىلىعى ەرەكشە. قالانىڭ توعىز جولدىڭ تورابىندا ورنالاسۋى سىرتقى جانە ىشكى تۋريستەر مەن جەرگىلىكتى تۇرعىندار ءۇشىن وتە قولايلى. سوندىقتان تۇركىستان قاي جاعىنان الساق تا، وبلىس ورتالىعى بولۋعا ابدەن لايىق»، - دەپ اتاپ ءوتتى ەلباسى.

بۇدان بۇرىن حابارلانعانداي، ق ر پرەزيدەنتى نۇرسۇلتان نازاربايەۆ «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسىنىڭ كەيبىر ماسەلەلەرى تۋرالى» جارلىققا قول قويدى.

بۇگىن ەلباسى نۇرسۇلتان نازاربايەۆ تۇركىستان وبلىسىنىڭ پايدا بولۋىنا بايلانىستى پىكىر ءبىلدىردى.