تۇركىستان وبلىسى قۇرىلدى - ق ر پرەزيدەنتىنىڭ جارلىعى
وسى ورايدا ق ر پرەزيدەنتىنىڭ اتالعان تاريحي وقيعاعا بايلانىستى جازىلعان ۆيدەوسىن AkordaPress الەۋمەتتىك جەلىدەگى پاراقشاسىندا جاريالادى، دەپ حابارلايدى قازاقپارات.
«بۇگىن «قازاقستان رەسپۋبليكاسىنىڭ اكىمشىلىك-اۋماقتىق قۇرىلىس تۋرالى» زاڭىنىڭ توعىزىنشى بابىنا سايكەس، شىمكەنت قالاسىنا رەسپۋبليكالىق ماڭىزى بار قالا مارتەبەسىن بەرۋ جانە وبلىس ورتالىعىن تۇركىستان قالاسىنا كوشىرۋ تۋرالى جارلىققا قول قويعالى وتىرمىن. بۇدان بىلاي بۇل ءوڭىر تۇركىستان وبلىسى دەپ اتالاتىن بولادى. وسى اكىمشىلىك اۋماقتىڭ قۇرىلىمىنا وزگەرىس ەنگىزۋ ارقىلى بۇل ءوڭىردىڭ وركەندەۋىنە تىڭ سەرپىن بەرۋدى كوزدەگەن تاريحي قۇجات بولىپ سانالادى»، - دەپ اتاپ ءوتتى مەملەكەت باسشىسى.
وسى ورايدا ەلباسى وڭتۇستىك قازاقستان ەلىمىزدەگى ەكونوميكالىق، كولىك-لوگيستيكالىق، دەموگرافيالىق الەۋەتى زور ايماق ەكەنىن، بيىل حالقىنىڭ سانى ميلليونعا جەتكەن شىمكەنت شاھارى قازاقستانداعى ەڭ ءىرى مەگاپوليستىڭ قاتارىنا قوسىلعانىن ەسكە سالىپ ءوتتى. اتاپ ايتقاندا، تاۋەلسىزدىك جىلدارىندا استانادان كەيىن شىمكەنت ميلليوننان اسا حالقى بار قالا رەتىندە تىركەلدى.
«مىندا وبلىستاعى ونەركاسىپ ءوندىرىسىنىڭ 60 پايىزى شىمكەنتتە شوعىرلانعان. شاھار ەلىمىزدەگى جەتەكشى ساۋدا-ونەركاسىپ جانە مادەنيەت وشاقتارىنىڭ ءبىرى بولىپ سانالاتىنىن بىلەمىز. قالانىڭ وسىنداي مۇمكىندىكتەرىن ەسكەرىپ، وعان رەسپۋبليكالىق مارتەبە بەرۋ جونىندە شەشىم قابىلدادىم. ال وبلىس ورتالىعى تۇركىستان قالاسىنا كوشىرىلەدى»، - دەدى نۇرسۇلتان نازاربايەۆ.
اۆتور: رۋسلان عابباسوۆ