شەتەلدىك ارنالاردىڭ جۇمىسىنا قاتاڭ تالاپتار بەلگىلەنەدى

استانا. قازاقپارات - شەتەلدىك تەلەارنالار كورسەتىلەتىن باعدارلامالارىنا ادامنىڭ جاس ارالىعىنا قاراي ءتيىستى بەلگىنى ورنالاستىرۋعا مىندەتتەلەدى.

بۇل تۋرالى سەناتتاعى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا اقپارات جانە كوممۋنيكاتسيالار ۆيتسە-ءمينيسترى نۇرگۇل ماۋبەرلينوۆا ءمالىم ەتتى، دەپ حابارلايدى قازاقپارات.

كوميتەت وتىرىسىندا «بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» ق ر زاڭىنىڭ جوباسى تالقىلاندى.

سەناتورلار ءمانى مەن ماعىناسى جوق تەلەباعدارلامالاردى بالالارعا كورسەتىلىمىن شەكتەۋ قاجەتتىگى ماسەلەسىن كوتەردى.

ءوز كەزەگىندە ۆيتسە-مينيستر ن. ماۋبەرلينوۆا اتالعان جاعدايعا بايلانىستى مونيتورينگ جۇرگىزىلەتىنىن، ونىڭ ناتيجەسىندە ءتيىستى باقىلاۋ جاسالاتىنىن اتاپ ءوتتى.

«سونىمەن قاتار، ءبىز شەتەلدىك تەلەارنالارعا وسىنداعى وكىلدەرى ارقىلى قاجەتتى ۇسىنىستاردى بەرەمىز. بۇل رەتتە ولار وزدەرىنىڭ باعدارلامالارىن قازاقستان زاڭناماسى اياسىندا كورسەتەدى، سايكەسىنشە كورسەتىلىم رۇقسات ەتىلگەن جاس ارالىعى مىندەتتى تۇردە بەلگىلەنەدى. 8- شىلدەگە دەيىن بارلىق شەتەلدىك تەلەارنالار وزدەرىنىڭ وكىلدىكتەرىن اشۋى ءتيىس. ەگەر دە وكىلدىكتەر اشىلماسا، وندا وسى ارنالار قازاقستان اۋماعىندا حابار تاراتا المايدى»، - دەدى ۆيتسە-مينيستر.

بۇدان بۇرىن حابارلانعانداي، قۇجاتتا ەڭ الدىمەن بەلگىلى ءبىر جاس توپتارىنداعى بالالار اراسىندا قانداي اقپاراتتىق ءونىمدى تاراتۋعا تىيىم سالىناتىندىعى جانە شەك قويىلاتىندىعى ايقىندالعان. ول ءۇشىن بالالارعا ارنالعان اقپاراتتىق ءونىمنىڭ جاس سىنىبى جانە جاس ساناتى دەيتىن ۇعىمدار ەنگىزىلىپ وتىر.

جوبا بويىنشا مۇنداي اقپاراتتىق ءونىمنىڭ تومەندەگىدەي جاس ساناتتارى بەلگىلەنگەن. 6 جاسقا دەيىن، 6 جاستان اسقان، 12 جاستاعى، 14 جاستاعى، 16 جاستاعى بالالاردىڭ جەتىلۋ جانە دۇنيەتانۋ مۇمكىندىگىنە سايكەس جىكتەلگەن. جالپى العاندا زاڭ جوباسى بويىنشا قاتىگەزدىك پەن زورلىق-زومبىلىققا قۇرىلعان، بالالاردىڭ ومىرىنە قاتەر توندىرەتىن ءىس-ارەكەتكە، سونداي-اق سۋيتسيدكە يتەرمەلەيتىن، پورنوگرافيالىق جانە ارنايى سەكسۋالدى-ەروتيكالىق كورىنىستەردى قامتيتىن اقپاراتتىق ونىمدەرگە تىيىم سالۋ قاراستىرىلۋدا.