ەكىنشى دەڭگەيلى پاتەرلەردىڭ يپوتەكاسى وزگەشە بولادى
ق ر ۇلتتىق بانكى ءتوراعاسىنىڭ ورىنباسارى ولەگ سمولياكوۆتىڭ ايتۋىنشا، «باسپانا» اتتى يپوتەكالىق كومپانيا بىرنەشە باعىتتا جۇمىس ىستەيتىن بولادى. باستاپقىدا جاڭا پاتەرلەرگە يپوتەكاعا بەرىلەدى. ودان كەيىن ەكىنشى دەڭگەيلى پاتەرلەردى ساتىپ الۋ باعىتى جۇزەگە اسادى.
«باسپانا» كومپانياسىنىڭ الدىندا ۇلكەن ماقسات تۇر. ول يپوتەكالىق نارىققا سەرپىن بەرۋى ءتيىس. ارينە، يپوتەكالىق نارىقتىڭ ىشىندە ەكىنشى دەڭگەيلى پاتەرلەر دە بار. سوندىقتان الداعى ۋاقىتتا ءبىز قوسىمشا پاكەتتەردى دە ازىرلەۋدى جوسپارلاپ وتىرمىز. ونىڭ ىشىندە ەكىنشى دەڭگەيلى پاتەرلەرگە يپوتەكا بەرۋ تەتىگى دە بولادى. ونى ءسال كەيىنىرەك جاسايمىز. شامامەن، ەكى-ءۇش ايدان كەيىن ىسكە ازىرلەيتىن شىعارمىز»، - دەدى و. سمولياكوۆ جۋرناليستەرگە بەرگەن سۇحباتىندا.
ونىڭ ايتۋىنشا، ەكىنشى دەڭگەيلى پاتەرلەردى ساتىپ الۋدىڭ شارتتارى وزگەشە بولادى. سەبەبى اتالعان باعىت الەۋمەتتىك باستاماعا جاتپايدى. «العاشقى جارنا 20 پروتسەنتتەن جوعارى بولاتىن شىعار. سوسىن نەسيەنىڭ مولشەرلەمەسى دە 7 پروتسەنت بولمايدى. ونىڭ مولشەرى نارىقتىق تالاپتارعا جاقىن بولۋى ىقتيمال. ءبىراق بانكتەردىڭ 14-15 پروتسەنتىنەن تومەن بولۋى كەرەك. البەتتە، جەڭىلدىك بولادى. ءبىراق «7-20-25» - تەن وزگەشە»، - دەپ اتاپ كورسەتتى و. سمولياكوۆ.