دونالد ترامپ: ا ق ش عارىش كۇشتەرىن قۇرۋ تۋرالى جارلىق شىعاردى
ترامپ اشىق عارىش كەڭىستىگىندە ا ق ش مۇددەسىن قورعايتىن قارۋلى كۇشتى قۇرۋ تۋرالى جارلىعىن 18- ماۋسىمدا عارىش ماسەلەلەرى بويىنشا ۇلتتىق كەڭەس جيىنىندا جاريالادى.
پرەزيدەنت عارىش قارۋلى كۇشتەرىن قۇرۋ ويى بارىن ناۋرىزدا بىلدىرگەن.
عارىشتا ۇلتتىق قاۋىپسىزدىكتى قامتاماسىز ەتەتىن جەكە قولباسشىلىق قۇرۋ تۋرالى دەبات 1990-جىلدارى بيلل كليتون اكىمشىلىگىنىڭ تۇسىندا-اق ايتىلا باستاعان ەدى. ا ق ش قورعانىس ءمينيسترى دجيم مەتتيس بىرنەشە اي بۇرىن كونگرەسسكە حات جولداپ، بۇل يدەياعا قارسىلىق تانىتقان.
مينيستر قارۋلى كۇشتەردىڭ جاڭا ءتۇرىن قۇرۋ جالپى قارۋلى كۇشتەردى باسقارۋدى قيىنداتاتىنىن ايتقان. ا ق ش- تا قازىر قارۋلى كۇشتەردىڭ بەس ءتۇرى - قۇرلىقتاعى اسكەر، تەڭىزدەگى اسكەر، اۋە كۇشتەرى، تەڭىز جاياۋ اسكەرى جانە جاعالاۋ كۇزەتى بار.
امەريكالىق ساراپشىلاردىڭ كوبى پرەزيدەنتتىڭ ءبىر عانا جارلىعىمەن اسكەردىڭ جاڭا ءتۇرى قۇرىلا سالمايتىنىن ايتادى. جاڭا قارۋلى كۇش قۇرۋ - كونگرەسستىڭ قۇزىرىنداعى ماسەلە. پرەزيدەنتتىڭ باستاماسىن كونگرەسسمەندەردىڭ قانشاسى قولدايتىنى ازىرگە بەلگىسىز.
«ازاتتىق»