تۇرىكمەنستاندا كوپ ايەل الۋعا تىيىم سالىندى

  استانا. قازاقپارات - تۇرىكمەنستاندا وتباسى كودەكسىنە كوپ ايەل الۋعا تىيىم سالاتىن جاڭا نورما ەنگىزىلدى.

بۇل تۋرالى ۇكىمەتتىڭ «نەيترالنىي تۋركمەنيستان» ورىس ءتىلدى گازەتى جازدى.

گازەتتە پرەزيدەنت گۋربانگۋلى بەردىمۇحامەدوۆ قول قويعان وتباسى كودەكسىنە ەنگىزىلگەن وزگەرتۋلەر مەن تولىقتىرۋلار تۋرالى زاڭ ءماتىنى بەرىلگەن.

قابىلدانعان زاڭ كودەكستىڭ 7-بابى «تۇرىكمەنستاندا كوپ ايەل الۋعا جول بەرىلمەيدى» دەپ تولىقتىرىلعان.

«كوپ نەكە ءبىر وتباسىندا ەكى نەمەسە بىرنەشە ايەلدەرمەن بىرگە تۇرۋ دەگەندى بىلدىرەدى» ، - دەپ ناقتىلانعان تولىقتىرۋدا. اتالعان زاڭ 2018 -جىلدىڭ 1 قىركۇيەگىنەن باستاپ قولدانىسقا ەنەدى.

تۇرىكمەنستاندا حالىقتىڭ كوپ بولىگى ءتورت ايەل الۋعا رۇقسات بەرەتىن يسلام ءدىنىن ۇستاناتىنىنا قاراماستان، ەلدە كوپ ايەل العان ادام قىلمىستىق جاۋاپقا تارتىلاتىن. ەندى قىلمىستىق كودەكسە سايكەس، كوپ ايەل العان ادام اسا ءىرى كولەمدە اقشالاي ايىپپۇل تولەيدى نەمەسە ەكى جىلعا دەيىن تۇزەۋ جۇمىستارىنا جىبەرىلەدى.

Baq.kz