وتباسىن قۇرۋدىڭ ەشكىم كۇتپەگەن پايداسى انىقتالدى

 استانا. قازاقپارات - وتباسىن قۇرۋ جۇرەك- قان تامىرلارى اۋرۋلارىنىڭ، ءينسۋلتتىڭ جانە ەرتە ءولىپ كەتۋ قاتەرىنىڭ الدىن الاتىنى انىقتالدى. ۇلىبريتانيانىڭ كيل ۋنيۆەرسيتەتىنىڭ عالىمدارى وسىنداي تۇجىرىم جاسادى.

 بۇل تۋرالى MedicalXpress باسىلىمىنا سىلتەمە جاساپ Stan.kz حابارلايدى.

ماماندار وتباسىلىق جاعداي مەن دەنساۋلىق اراسىنداعى بايلانىستى انىقتاۋ ءۇشىن، 1963-2015 -جىلدار ارالىعىندا جۇرگىزىلگەن 34 كولەمدى زەرتتەۋدى تالداعان. زەرتتەۋگە 42-77 جاس ارالىعىنداعى 2 ميلليوننان استام ەرىكتى قاتىستى.

انىقتالعانداي، ەشقاشان وتباسىن قۇرماعان، جەسىر قالعان نەمەسە اجىراسقان ادامدار جۇرەكتىڭ يشەميالىق اۋرۋىنان جانە ينسۋلتتەن ءجيى كوز جۇمعان. ياعني ولاردا ءولىم قاتەرى 42-55 پايىزعا ارتقان.

ءوز كەزەگىندە اجىراسۋ ادامدا جۇرەك- قان تامىرلارى اۋرۋلارىنىڭ دامۋ مۇمكىندىگىن 25 پايىزعا، ينسۋلت قاتەرىن 16 پايىزعا ارتتىرعان ەكەن.

عالىمدار مۇنداي كورسەتكىشتى وتباسىن قۇرعان ادامداردىڭ دەنساۋلىعىنا بايلانىستى قيىندىقتاردى ەرتەرەك بايقاپ، دارىگەردىڭ كومەگىنە جۇگىنىپ، ءدارىنى ۋاقىتىلى قابىلداپ، جاعدايىنىڭ جانە الەۋمەتتىك بايلانىسىنىڭ جاقسى بولۋىمەن ءتۇسىندىردى.