الماتىداعى بالۋان شولاق اتىنداعى سپورت سارايى مەملەكەتكە قايتارىلادى
بۇل تۋرالى قالالىق قوعامدىق كەڭەستىڭ وتىرىسىندا بەلگىلى بولدى، دەپ حابارلايدى قازاقپارات ءتىلشىسى.
وتىرىستا قالالىق تۋريزم جانە سىرتقى بايلانىستار باسقارماسىنىڭ ەسەبى تىڭدالدى.
باسقارما وكىلدەرى تۋريستىك اۆتوبۋس باعدارلارىن رەتتەۋ تۋرالى جوسپارلارىمەن ءبولىستى.
«بيىل بالۋان شولاق اتىنداعى سپورت كەشەنىنىڭ بازاسىندا تۋريستىك بازا اشۋدى جوسپارلاپ وتىرمىز. سىزدەر بىلەتىندەرىڭىزدەي، وتكەن جىلى جاعدايى سىن كوتەرمەيتىن ءبىرقاتار نىساندى قالا مەنشىگىنە قايتارۋ كەرەكتىگى جايلى ماسەلە كوتەرىلگەن بولاتىن. ويتكەنى، بۇل نىسانداردى قالپىنا كەلتىرۋ كەرەك بولدى. وسى باعىتتا بالۋان شولاق اتىنداعى سپورت كەشەنى اكىمدىككە بەرىلەدى. ءقازىر ەسكيز سىزىلىپ جاتىر. تۋروپەراتورلارمەن كەزدەسۋ جۇرگىزىلدى. كاسىپكەرلەرمەن دە اڭگىمە جۇرگىزىلدى»، - دەدى باسقارما باسشىسى ەرلان جايلاۋباي.
كونسەپسيا بويىنشا سپورت سارايىنان الماتى جانە الماتى وبلىسىنىڭ كورنەكتى ورىندارىن ارالاۋعا تۋريستىك اۆتوبۋستار شىعادى. بۇل جەردەن كولساي، قايىڭدى، شارىن، تالعار ەلدى مەكەندەرىنە باعىت اشىلادى.
«قازىر ءار تۋرفيرما ءار ايماقتان شىعادى. ءبىر جۇيەگە كەلتىرۋ كەرەك. ساتپايەۆ پەن اباي كوشەسىنىڭ ورتاسىندا بايتۇرسىنوۆ كوشەسىنىڭ بويىندا ورىن بەلگىلى. سپورت سارايىن قالا مەنشىگىنە قايتارعان سوڭ قوسىمشا تۇراقتار جاسالىنادى»، - دەدى ەرلان جايلاۋباي.
قالادا تۋريستىك جاعدايدى جاقسارتۋعا ناۆيگاتسيا، اۆتوبۋستاردىڭ جۇمىسى، ءۇش تىلدىلىك، اقپاراتتاندىرۋ جۇيەسى وزگەرەتىن بولادى. اتاپ ايتقاندا تەمىر جول، اۆتوۆوكزالدار، ابىلاي حان كوشەسى مەن گوگول كوشەسى قايتا جاسالادى.
قوعامدىق كەڭەس مۇشەلەرى «سايران» اۆتوۆوكزالىندا تۋريستەردىڭ ەكىنشى نۇكتەسىن ورنالاستىرۋ تۋرالى باستاما كوتەردى.
سونىمەن قاتار، قوعامدىق كەڭەس مۇشەلەرى قوس قاباتتى اۆتوبۋستار ساتىپ الۋ تۋرالى وي ايتتى.
ەرلان جايلاۋبايدىڭ ايتۋىنشا، 400 مىڭ ا ق ش دوللارى قاجەتتىگىن ايتتى.
سونداي-اق، جاقىندا «قازاق فيلم» الاڭىندا ەتنو-لەند اشىلاتىنى بەلگىلى بولدى.